د امریکا ولسمشر د افغان جګړې په تړاو د خپلو څرګندونو په دوام تازه ویلي چې په افغانستان کې د امریکا جګړه بې مانا او مسخره وه. ټرمپ پرون د خپلو پلویانو یوې غونډې ته دا خبره کړې او ټینګار یې کړی چې ژر به له افغانستان خپل سرتېري وباسي. ټرمپ همدا راز ویلي چې دغه جګړه د تېرو حکومتونو د تېروتنې له امله رامنځ ته شوې او اوسنی سیال یې جو بایډن هم پکې ښکېل دی. هغه زیاته کړې چې تېرو حکومتونو د تېروتنو د پټولو لپاره نورې تېروتنې هم کړې دي چې دی یې نه تکراروي.
د امریکا ولسمشر چې په ځلونو یې په افغانستان کې د امریکا پيل کړې جګړه بې مانا بللې، اوس یو ځل بیا ټينګار کړی چې دغه جګړه تشې مسخرې وه. د ده په خبره، د افغانستان جګړې د امریکا لپاره هېڅ ګټه نه لرله، خو هر کال د امریکایانو میلیاردونه ډالر په دغه جګړه لګېدلي دي. د ده په وینا: ((ستاسې پیسې، ستاسې وینې، پوهېږئ ستاسې وینې په افغانستان کې تویې شوې. د بې مانا جګړې لپاره. هغه څه چې تاسې ګټل هغه په افغانستان کې لګول کېدل)).
ټرمپ همدا راز ویلي چې په افغانستان کې د امریکا ۱۹ کلنه جګړه هسې مسخره وه او د واشنګټن لپاره یې هېڅ ګټه نه لرله. د ده په خبره، له افغانستانه د خپلو سرتېرو ایستلو ته ژمن دی او تر دې دمه یې زرګونه سرتېري ایستلي دي. ټرمپ زیاته کړې: ((پوهېږئ دا مسخره جګړه وه. زموږ لپاره یې هېڅ ګټه نه لرله، خو زموږ سرتېري هلته جنګېدل. دا مسخره وه، اوس خپل سرتېري له دغه بې مانا جګړو وباسم)).
نوموړي د امریکا د تېر حکومت چارواکي هم په کم کارۍ او ناکامۍ تورن کړي دي او په خبره یې، د دوی د تېروتنو له امله زرګونه امریکایان په افغانستان کې وژل شوي او میلیاردونه ډالر لګول شوي دي. ټرمپ یې اوسنی سیال جوبایډن هم د دې تېروتو کسانو له ډلې ګڼلی او په خبره یې، دغه کسان د تېروتنو د پټولو لپاره نورې تېروتنې کوي. د ده په باور: ((دغه کسانو څه کول په خپلو تېروتنو یې سرپوښ اېښود. پوهېږئ سرپوښ څه مانا؟ یعنې په تېروتنو یې خپلې تېروتنې پټولې. زموږ پیسې او وینې یې دومره لرې ځای لګولې)).
ټرمپ تر دې وړاندې هم په ځلونو په افغانستان کې د امریکا جګړه بې مانا بللې او بېړه یې کړې چې څومره ژر وکولی شي له دغه هېواده خپل سرتېري وباسي. بلخوا بیا نړیوالې رسنۍ د افغانستان په اړه د امریکا سیاستونه ناکام او مقطعهيي بولي. دې هېل نشریې په تازه خپاره کړي مطلب کې ویلي چې امریکا هېڅ وخت د افغانستان په اړه ثابته تګلاره نه لاره او لنډمهاله پلانونو یې په افغانستان کې جګړې اوږدې کړې. سرچینه کاږي: ((امریکا کله سرتېري ډېر کړي، کله یې کم کړي، کله یې د بشپړو ایستلو ګواښ کړی دی، چې له دې هر څه سره دوی په دغه هېواد کې د جګړې پر ختمولو نه دي بریالي شوي)).
دې هېل نشریه د سولې په اړه هم د امریکا تګلاره ناکامه او له خنډونو ډکه بولي او په خبره یې، ټرمپ یوازې د خپلو سرتېرو د ایستلو لپاره د افغانستان د راتلونکې په اړه هېڅ راز فکر نه دی کړی. سرچینه کاږي چې د طالبانو تګلاره او مفکوره ټولې نړۍ ته معلومه ده، نو پر دغه ډله د امریکا دومره بېړنی باور د حیرانتیا وړ دی. سرچینه وايي، په افغانستان کې د ثبات راوستو او بهرنیو سرتېرو د ایستلو لار دا وه چې په دغه هېواد کې د یوه پیاوړي مرکزي حکومت هر اړخیز ملاتړ شوی وی. سرچینه کاږي: ((په دغه هېواد کې دې پیاوړی حکومت جوړ شي. له فساد سره دې د مبارزې لپاره فشار ورباندې راوستل شي. د امنیتي او دفاعي ځواکونو هر اړخیز ملاتړ دې وشي)).
ټرمپ داسې مهال دغه جګړه بې مانا بولي چې امریکا پوره ۱۹ کاله پر افغانانو ځمکه سور تبخی کړې او له هرې افغان کورنۍ د امریکا پیل کړې جګړه تلفات اخلي. هره ورځ زرګونه افغانان بې کوره کېږي او لا هم د دې هېل نشریې په خبره، د امریکا ناکام پلانونه په افغانستان کې د جګړو د کمېدو سبب نه دي شوي.
