سره له دې چې نړیوال او د افغانستان په مسئله کې ټول ښکېل اړخونه د طالبانو او افغان حکومت د جګړو د کمېدو غوښتونکي دي، خو د دواړو لورو ترمنځ جګړې د پخوا په پرتله ډېرې شوې او ملکي تلفات لوړ شوي دي. کورنیو چارو وزارت په تازه څرګندونو کې ویلي چې طالبانو په تېرو پنځوسو ورځو کې په خونړیو جګړو کې ملکي وګړو ته درنه مرګ ژوبله اړولې ده.
سرچینه وایي چې طالبانو ګڼ تهاجمي بریدونه کړي او تر څنګ یې ځانمرګي بریدونه هم ډېر کړي دي. بلخوا د نظامي چارو شنونکي بیا حکومت د جګړې په مدیریت کې ناکام بولي.
نږدې دوې میاشتې کېږي چې د طالبانو او افغان حکومت ترمنځ د مخامخ مذاکراتو لړۍ پيل شوې، خو دواړه خواوې لا نه دي توانېدلې چې د مذاکراتو پر تګلاره توافق وکړي. بلخوا په هېواد کې بیا د طالبانو او حکومت ترمنځ جګړه اوج ته رسېدلې ده. ملګرو ملتونو تېره اونۍ په خپل راپور کې په افغانستان کې د ملکي وګړو پر تلفاتو اندېښنه ښودلې وه. د یوناما په راپور کې راغلي وو چې د سولې مذاکراتو د ملکي تلفاتو په شمېر کې کموالی نه دی راوستی.
اوس تازه د کورنیو چارو وزارت هم وایي چې د طالبانو په بریدونو او جګړو کې په تېرو پنځوسو ورځو کې ۲۶۱ ملکیان وژل شوي دي. د کورنیو چارو وزارت ویاند طارق آرین رسنیو ته ویلي چې طالبانو د سولې د خبرو له پیل وروسته خپل بریدونه ډېر کړي دي چې له امله یې په تېرو پنځوسو ورځو کې ۲۶۱ ملکي وګړو ته مرګ ژوبله اړولې ده. نوموړي همدا راز ویلي چې په بېلو پېښو کې ۶۰۳ ملکي وګړي ټپیان شوي هم دي. طارق آرین وايي چې طالبانو په دې موده کې ۹۵۹ یرغلیز بریدونه کړي، ۱۴ یې ځانمرګي بریدونه کړي او ۲۶۳ کړۍ ماینونو ته یې هم چاودنه ورکړې ده.
کورنیو چارو وزارت همدا راز وایي چې د طالبانو ګڼ بریدونه افغان امنیتي ځواکونو یا شنډ کړي او یا یې په شا تمبولي دي. هغه د افغان ځواکونو د تلفاتو په اړه څه نه وايي، خو په خبره یې، په پنځوسو ورځو کې افغان ځواکونو تر ۲ زره پورې طالب وسله والو ته مرګ ژوبله اړولې ده. د ده په خبره: ((افغان امنیتي او دفاعي ځواکونو د طالبانو د تهاجمي بریدونو په ځواب کې دوی ته درانه تلفات اړولي دي. په همدې لړ کې په تېرو پنځوسو ورځو کې تر ۲ زره ډېرو طالبانو ته مرګ ژوبله اوښتې ده)).
وسله والو طالبانو د افغان حکومت د دې ادعا په اړه تر اوسه څه نه دي ویلي، خو ناټو یو ځل بیا له طالبانو غوښتي چې تاوتریخوالی کم کړي. په افغانستان کې د ناټو ملکي استازي سټېفانو پانتیکورو په وروستیو څرګندونو کې ویلي چې جګړه باید کمه کړل شي او دواړه لوري دې خبرې چټکې کړي. د ده په وینا، په افغانستان کې روانه جګړه یوازې او یوازې د خبرو له لارې د ختمېدو وړ ده او دواړو لورو ته په کار ده چې تاوتریخوالی کم کړي او دایمي اوربند ته لار هواره کړي.
ارګ بیا وایي چې طالبان سولې ته زړه نه ښه کوي او پر ځای یې تاوتریخوالي ته ادامه ورکوي. د ولسمشر د ویاند مرستیال دوا خان مینه پال وايي، افغان حکومت د طالبانو شپږ زره او سل بندیان د حسن نیت لپاره خوشي کړل، څو دغه ډله تاوتریخوالی کم کړي او مذاکرات وکړي، خو دوی جګړه شدیده کړې ده او دې مسئلې ثابته کړه چې طالبان تر سولې پر جګړه ډېر باوري دي.
د نظامي چارو شنونکي بیا په دې باور دي چې حکومت د جګړې په مدیریت او د خپلو ساحو په ساتلو نه دی بریالی شوی. د نظامي چارو کارپوه جنرال عتیق الله امرخېل وايي، ولسوالۍ او کلي هره ورځ د طالبانو لاس ته ورځي، ملکي تلفات لوړ شوي دي، د افغان ځواکونو تلفات لوړ دي او دا هر څه د حکومت د کمزوري مدیریت په مانا ده. هغه وايي: ((په قومانده کې کمزوري ده، په استخباراتو کې کمزوري ده، جګړه سمه نه مدیریت کيږي)).
