معصوم ستانکزی طالبانو ته؛ که د ملکي تلفاتو درولو ته ژمن وی، نو ژر اوربند وکړئ

که طالبان د ملکي افغانانو د وژنې د روان بهیر دریدو ته ژمن وي نو ژر تر ژره دې اوربند وکړي. د افغان حکومت د مذاکراتي پلاوي مشر معصوم ستانکزي په تازه ټوېټ پیغامونو کې په کابل پوهنتون کې وروستۍ خونړۍ پېښه غندلې ده او په خبره یې ددې ټولو بریدونو او وحشتونو مرکز یو دی خو له بېلو څانګو فعالیت ترسره کوي. نوموړي ویلي که طالبان په رښتیا د وینې درولو ته ژمن وي او غواړي ددښمن لاس د افغانانو له مرۍ لنډ کړي نو ژر تر ژره دې اوربند وکړي او د سولې خبرو ته دې ادامه ورکړي. هغه وسله والو طالبانو ته په اشارې ویلي چې په دې برید کې ښکېل دي او ځانونه د مسوولیت په نه منلو نه شي خلاصولی. معصوم ستانکزی همدا راز وایي چې دغه خونړۍ او وحشتناکه پېښه د ترسره کوونکو پر تندي تور داغ دی چې هېڅ وخت به و نه بښل شي.