د ولسمشر لومړي مرستیال امرالله صالح ته د کابل ښار د امنیتي مسوولیت له سپارلو دوې میاشتې اوړي، خو نه یوازې دا چې په امنیتي وضعیت کې ښکاره بدلون رامنځته نه شو، بلکې د پخوا په پرتله وضعیت نور هم خراب شوی دی. پر کابل سربېره، د هېواد په نورو لویو ښارونو کې هم امنیتي وضعیت ورځ تر بلې ترینګلی کېږي. د مقناطیسي ماینونو چاودنو، هدفي وژنو، مرګونو جنايي پېښو او وسله والو غلاوو، د کابل په ګډون د ګڼو نورو ښارونو د اوسېدونکو ژوند تریخ کړی دی. چارواکي بیا هم د پخوا په څېر تکراري او فېسبوکي ژمنې کوي، خو وضعیت ورځ تر بلې د ترینګلتیا پر لور روان دی.
د جنايي پېښو او وسله والو غلاوو د ډېرېدو ترڅنګ، د هېواد په ګوټ ګوټ، آن په ډېرو حساسو او تر سختو امنیتي تدابیرو لاندې سیمو او ښارونو کې هره ورځ هدفي وژنې کېږي، د مقناطیسي ماینونو چاودنې کېږي، خو حکومت یوازې د روان وضعیت ناندره کوي، هرڅه یې تر یوې اعلاميې خپرولو، غندنې او د وژنو د ارقامو تر اعلان پورې محدود کړي. خو بلخوا د سیاسي مشرانو، قومي مخورو، ژورنالیستانو او د مدني ټولنې د مشرانو وژنې ورځ تر بلې په ډېرېدو دي. که څه هم د دغو بریدونو او چسپکي ماینونو مسوولیت په ښکاره توګه څوک پر غاړه نه اخلي. حکومت او په تېره بیا د امنیتي ادارو چارواکي دا ډول بریدونه او چاودنې د طالبانو کار بولي، خو طالبانو بیا بیا د حکومت دغه ادعاوې رد کړې دي. په ولایتونو او لرې پرتو سیمو کې د جګړو او نښتو ترڅنګ، د کابل ښار په ګډون په نورو ښارونو کې هدفي وژنو او د چسپکي ماینونو چاودنو خلک اندېښمن کړي، خلک او د ملي شورا غړي، کشفي او امنیتي ادارې د دا ډول پېښو په مخنیوي کې ناکامې بولي. همدا پرون هم مشرانو جرګې د وروستیو مرمزو وژنو او د امنیتي وضعیت د خرابېدو په تړاو د کورنیو چارو وزیر مسعود اندرابي د ملي امنیت رییس احمد ضیا سراج د تېرې ورځې غونډې ته وربللي وو. نوموړي وویل چې د وروستیو هدفي بریدونو او ماین چاودنو تر شا طالبان لاس لري او په خبره يې، د دوحې تر هوکړې وروسته طالبانو د مذاکراتو پر مېز د امتیاز تر لاسه کولو لپاره خپلو بریدونو او په ښارونو کې د دولتي کارکوونکو، خبریالانو او مدني فعالانو ترور ته زور ورکړی دی.
خو حقیقت دا دی چې د امنیتي ادارو د مسوولینو دا ډول توجیهات او دلیلونه نور ډېر تکراري او کلیشه شوي دي. خلک نور په دا ډول خبرو باور نه کوي، بلکې د وضعیت د ښه کېدو لپاره له حکومت څخه د کوټلو ګامونو پورته کول غواړي. چارواکي باید نور د تکراري ژمنو، فیسبوکي حکومتولۍ او تشو شعارونو پرځای عملي ګامونه اوچت کړي، د وضعیت د ښه والي لپاره دې منظم پلان او پروګرام جوړ کړي، ټول هغه مفسد چارواکي دې له دندو ګوښه کړي چې د خپل اصلي مسوولیت پرځای پر نورو کارونو بوخت دي. امنیتي ادارې لاهم پراخو اصلاحاتو ته اړتیا لري، دا ادارې دې د سیاسي معاملو له دامونو را ویستل شي او خپلو اصلي مسوولیتونو ته دې متوجه کړل شي. روان وضعیت هېچا ته نور د منلو نه دی، خلک له دې حالت ستړي شوي او د وضعیت د ښه والي لپاره ژمنې نه، بلکې عملي اقدامات غواړي.
