ولسمشر غني یو ځل بیا ویلي چې واک یوازې د ټاکنو له لارې نوي راتلونکي ولسمشر ته پرېږدي او له دې پرته به واک پرې نه ږدي. نوموړي دا خبرې له هغه وروسته کړې دي چې له بېلابېلو لورو د سولې په پروسه کې پر موقت یا انتقالي حکومت د بحث خبرې را پورته شوې دي. که څه هم طالبانو بیا بیا موقت حکومت رد کړی، خو ځینې کسان وايي چې د سولې په پروسه کې یو انتقالي حالت ته اړتیا ده چې پکې به دې دواړو لورو ترمنځ شوي توافقات عملي کېږي او دا حکومت به یو اوږدمهاله حکومت ته لار پرانیږي. دا خبرونه هم شته چې آن خپله ولسمشر غني ویلي چې موقت حکومت په دې شرط مني، چې مشري یې خپله ده ته وسپارل شي، خو طالبانو دا طرحه رد کړې ده.
د موقت، انتقالي یا سرپرست حکومت پر څرنګوالي او اړتیا بحث کېدلی شي، ځکه چې ښايي د سولې په پروسه کې همداسې یو دولت ته اړتیا وي، خو دا چې هر څه یو مخ رد شي، دا بیا د سولې د مخالفت مانا لري. کله چې ولسمشر غني وايي چې واک به بل ټاکل شوي ولسمشر ته سپاري، دا په دې مانا ده چې نوموړی به خپله د واک موده پوره کوي او بیا به ټاکنې کېږي چې پکې به نوی ولسمشر راځي او بیا به واک ورسپارل کېږي. ولسمشر غني هېروي چې د افغانستان د سولې پروسه کومه عادي پروسه نه ده، بلکې که بریالۍ شي، نو په دې هېواد کې یو شل کلن خونړی جنګ ختموي، نو ځکه څوکۍ، واک او ډېر نور څه به پکې قرباني کېږي. د ولسمشر غني تصور دا دی چې طالبان دې د ښاغلي حکمتیار په مشرۍ د اسلامي حزب په شان راشي او د کابل په یوه څنډه کې دې واړوي او بیا دې د نړۍ په تر ټولو ناوړه، له درغلیو ډکو او شرموونکو ټاکنو کې برخه واخلي. په داسې حال کې چې نه طالبان د حزب اسلامي په شان دي او نه هم دا چاره ممکنه ده. که طالبان په موقت یا لنډمهاله اداره راضي شي، باید ومنل شي او د سولې پروسه مخ ته ولاړه شي. د ولسمشر غني دا تصور نه واقعي دی او نه یې هم خلک ورسره مني. یوازې خپله ولسمشر او څو ملګري یې د واک دې جنون اخیستي او هېره کړې یې ده چې د افغانستان خلک د سولې لپاره دې ده د ولسمشرۍ په ګډون ډېر څه قرباني کولی شي.
د سولې پروسه باید مخ ته ولاړه شي. دواړه اړخونه به په طبیعي ډول یو بل ته یو څه ورکوي او یو څه به اخلي. واک به حتمي ویشل کېږي، موقت یا انتقالي حکومت به راځي او که دا نه وي، په نوي حکومت به توافق کېږي او اشرف غني مجبور دی چې واک پرېږدي. په ارګ کې واکمن باید درک کړي چې د افغانستان خلک او نړۍ په افغانستان کې سوله غواړي او سولې ته د رسېدو لپاره هېڅ ډول خنډ او ځنډ ورته د زغملو وړ نه دی. که د سولې په خبرو کې پرمختګونه وشي او طالبان هم انعطاف وښیي، نو ولسمشر به بیا د خنډ جوړولو پر مهال د خلکو له سخت او جدي غبرګون سره مخ شي.
