ترکمنستان: ټاپي پروژې د پام وړ پرمختګونه لرلي دي

ترکمنستان وایي د ټاپي پروژې په عملي کولو کې یې د پام وړ پرمختګونه لرلي دي. د ترکمنستان د بهرنیو چارو وزیر رشید مرادووف وایي د ټاپي پروژې په برخه کې پرمختګونه تر دې ځایه رسېدلي چې ډېر ژر به یې ساختماني کارونه پيل شي. هغه وایي ټاپي نل لیکه باید لومړی تر هرات ورسول شي او تر هغه وروسته به پاکستان او هند ته ځي. نوموړي ویلي افغان حکومت په دې برخه کې پوره همکاري کړې ده او ددې پروژې د مسیر لپاره یې د ځمکو د استملاک قانون جوړول مهم پرمختګ دی. په ورته وخت کې د اسیا پراختیایي بانک ویلي چې دوی ددې پروژې ملاتړي دي او غواړي په سیمه کې د افغانستان او ترکمنستان اړیکې په خپلو کې پراخې شي. ترکمنستان هیله څرګنده کړې چې وکړی شي ژر تر ژره دغه پروژه ګټه اخیستنې ته وسپاري. ټاپي له ترکمنستان افغانستان، هند او پاکستان ته د ګازو د لېږد پروژه ده چې ویل کېږي زرګونه افغانانو ته به پکې د کار زمینه برابره کړل شي.