په تېرو څو ورځو کې طالبانو په ځینو سیمو کې ډرون الوتکې کارولي او پر امنیتي ځواکونو یې بریدونه کړي دي. که څه هم دغو بریدونو پراخه مرګژوبله نه ده اړولې، خو پراخه وېره یې خوره کړې ده. په همدې دریو ورځو کې په کندوز کې دوه ځله طالبانو همدا کار کړی، چې په یوه همداسې برید کې یې د پوځ یو چورلکه هم زیانمنه کړې ده. پرون یو ځل بیا طالبانو د اردو پر یو کنډک د ډرون په مرسته برید کړی چې مرګ ژوبله نه لري. په دواړو بریدونو کې امنیتي ځواکونه نه دي توانېدلي چې ډرون را وغورځوي، نو ځکه ډرون خوندي تللي دي.
د طالبانو له خوا د ډرون کارونه څه پیغام لري او څه کول پکار دي؟
اوس واضح شوه چې طالبانو ډرون تر لاسه کړي چې په هوايي بریدونو او جاسوسۍ کې یې کاروي. که څه هم دا ډرون جنګي نه دي، خو طالبان یې په بریدونو کې کاروي. وروستۍ پېښې ښيي چې طالبان غواړي دا الوتکې و ازمويي او معلومه کړي چې دوی په کومو ځایونو کې د الوتکو پر مټ څه ډول بریدونه کولی شي. ښايي په راتلونکي کې د دغه ډول ډرون الوتکو کارونه او پر مټ یې بریدونه زیات شي. دا کار ښيي چې د افغانستان جګړه لا پېچلې کېږي او څومره چې جګړه اوږدېږي، ورسره د جګړې ډګر ته نوې وسلې هم راځي. اټکل دی چې تر اوسه د امریکا له وېرې داسې وسلې افغان جګړې ته نه راتللې چې د جګړې بڼه دا ډول بدله کړي، خو اوس چې امریکا وځي، نو ځیني سیمهییز ځواکونه به هڅه وکړي چې د افغانستان جګړه لا پېچلې کړي. د دې لپاره د نورو کارونو تر څنګ یوه لاره دا ده چې ښکېلو اړخونو ته داسې وسلې ورکړي چې د جګړې پر توازن اغېز وکړي او هغه ځایونه له ګواښ سره مخ کړي چې تر اوسه پورې امن ګڼل کېدل. دا کار ښايي د دې لپاره هم وي چې سیمهییز هېوادونه ځیني وسلې و ازمویي او یا هم په جګړه کې داسې بدلون راولي، چې د دوی په ګټه تمام شي.
څومره چې جګړه غځېږي، همدومره خونړۍ او پېچلې کېږي. هغوی چې په جګړه ټینګار کوي او سوله جدي نه ګڼي، باید پوه شي چې له داسې حالت سره مخ کېدلی شي چې تر اوسه نه وو مخ شوي او آن د دغه ډول حالت اټکل هم ناشونی دی. یوه بېلګه یې همدا ده چې طالبانو ډرون پیدا کړي چې دا یې لومړني څرګونه دي. که یې پیل له داسې وېروونکو بدلونونو کېږي، نو وروسته به کیسه لا زیاته خرابه وي.
هغوی چې په جګړه ټینګار کوي، باید پوه شي چې ګواښ لوی دی او ډېر څه د وړاندوینې او اټکل وړ نه دي. د جګړې دوام سر له اوسه د لوی خطر زنګونه لري. د طالبانو له خوا د ډرون کارول ښيي چې اوس ډېر ځایونه خوندي نه دي او هېڅوک په جګړه کې ګټه نه شي کولی. له همدې امله پر جګړه د ټینګار پر ځای باید پر سوله ټینګار وشي. د سولې لپاره قرباني حتمي ده او پکار ده چې موږ د لوی ګواښ د مخنیوي لپاره ډېر قرباني ورکړو او سوله بریالۍ کړو.
