د پلازمېنې زون د پراختیا اداره وايي، چې په کابل ښار کې د نږدې ۷۰۰ میلیونو افغانیو په لګښت څلور کیلومتره سړک جوړوي.
یاده اداره زیاتوي چې د دغه سړک په بشپړېدو به ترافیکي ګڼه ګوڼه کمه شي. د پلازمېنې زون پراختیا ادارې رییس نجیب الله شینواري د دغه سړک پرانیستې په مراسمو کې وویل، د کابل ښار د ۱۱مې او ۱۷مې حوزو د مواصلاتي سړک د دویمې برخې چارې پیل شوې او په ۲۸ میاشتو کې به بشپړې شي.
نوموړي زیاته کړه، دغه سړک څلور کیلومتره اوږدوالی لري چې د شاه توتک سیمې د کارېزمیر سیمې د پخوانۍ تلاشۍ له سیمې سره تړي. د سرچینې په خبره، د دې پروژې تطبیق د شمال لویې لارې د ترافیکي ګڼې ګوڼې په کمېدو کې مهم دی او د ۱۱مې او ۱۷مې ناحیو مواصلاتي لار د امکان تر کچې لنډوي.
د هغه په خبره، د دې پروژې لګښت چې شاوخوا ۷۰۰ میلیونو افغانو ته رسېږي، د پلازمېنې زون د پراختیا ادارې له خوا ورکول کېږي.
