د کرنې وزارت ویاند اکبر رستمي پرون ازادي راډیو ته وویل، چې دغه شنې خونې د څه باندې ۱۰۰ میلیونو افغانیو په لګښت جوړې شوې دي.
نوموړي زیاته کړه، د دغو شنو خونو د جوړولو ۸۵ سلنه لګښت د کرنې وزارت او یوازې ۱۵ سلنه لګښت یې د برخمن شويو کسانو لخوا ورکړل شوی دی. د کرنې وزارت د معلوماتو له مخې، په ۱۳۹۹یم مالي کال کې د کرنې وزارت د ننګرهار د کرنې، مالدارۍ، اوبولګولو او بڼوالۍ په بېلابېلو برخو کې څه باندې ۷۵۸ میلیونه افغانۍ لګولې دي.
دغه وزارت دغه شان په ننګرهار کې د مېوه لرونکو ونو د نیالګیو کېنولو کمپاین هم پیل کړی دی. یاد وزارت وایي، په ۱۴۰۰یم مالي کال کې د ننګرهار په بېلابېلو ولسوالیو کې د سټروسو، املوکو، شفتالو او نورو مېوو دوه زره جریبه بڼونه جوړوي، چې ټولټال یې د جوړولو ټولیز لګښت ۷۷ میلیونه افغانۍ ښودل شوی دی.
