ولسمشرۍ ماڼۍ د امریکايي ورځپاڼې وال سټریټ ژورنال پر هغه راپور غبرګون ښودلی چې ویلي یې دي، د افغانستان د سولې لپاره د امريکا د بهرنیو چارو وزارت ځانګړي استازي زلمي خلیلزاد د ولسمشريزو ټاکنو د ځنډ غوښتنه کړې ده.
د ولسمشر ویاند محمد هارون چخانسوري ویلي چې د ولسمشرۍ ټاکنې د اساسي قانون د حکم پر بنسټ پر خپل وخت کېږي.
چخانسوري رسنيو ته په استولي پيغام کې ویلي دي، د خلکو له هغې غوښتنې پرته چې په اساسي قانون کې تصریح شوې بل هېڅ انتخاب د منلو نه دی.
چخانسوري ويلي: «د ولسواکۍ په پروسه کې د خلکو د واک دوام یو لازمي اصل دی، د افغانانو هغه غوښتنه چې د هېواد په اساسي قانون کې صراحت لري، بل انتخاب د منلو وړ نه دی، افغان حکومت د هېواد د اساسي قانون له مخې او د انتخاباتو د خپلواک کمېسیون له لوري د جمهوري ریاست د ۱۳۹۸ لمریز کال د انتخاباتو اعلان شوې نېټې ته ژمن دی».
امریکايي ورځپاڼې وال سټریټ ژورنال په يوه مقاله کې ويلي چې د امریکا حکومت ښایي په افغانستان کې د سولې خبرو د بریالیتوب لپاره له افغان حکومته وغواړي چې د راتلونکي کال د ولسمشرۍ ټاکنې وځنډوي.
ورځپاڼې لیکلي، یو شمېر امريکايي چارواکي وېره لري چې د خلیلزاد له لوري پیل شوې د سولې هڅې ښايي له افغان ټاکنو سره د ملو لانجو او اوږدې سیاسي ترينګلتیا له امله شنډې شي.
ويل کېږي چې خليلزاد له افغان سياسيونو سره په ليدنو کې درې وړانديزونه مطرح کړي، چې د ولسمشريزو ټاکنو له ځنډولو، د لويې جرګې له رابللو او دغه راز د موقتې ادارې له رامنځته کولو څخه عبارت دي.
که څه هم وال سټریټ ژورنال خپلې سرچینې نه دي په ډاګه کړې، خو د افغان ولسمشر محمد اشرف غني ستر سلاکار فضل محمود فضلي ویلي چې خلیلزاد په خپل وروستي سفر او له افغان چارواکو سره په لیدنه کې د ولسمشريزو ټاکنو د ځنډولو مسئله نه ده مطرح کړې.
د ملي يووالي حکومت اجرايه رييس ډاکټر عبدالله عبدالله هم د امريکا له سفير سره تر ليدنې وروسته ويلي چې ولسمشريزې ټاکنې به پر خپل وخت کېږي.
د وال سټرېټ ژورنال پر راپور غبرګونونه بېلابېل دي، خو په ټوله کې ويل کېږي چې که د سولې پروسه بريالۍ کېږي نو د ټاکنو ځنډ بايد ډېر جدي ونه نيول شي.
د چارو شنونکی مشتاق رحيم وايي، د موقتې ادارې د رامنځته کېدو پلوی نه دی خو د سولې لپاره د ولسمشريزو ټاکنو ځنډېدل جدي موضوع نه بولي.
په ورته وخت کې د سولې عالي شورا مرستیال عزیز الله حاجي دین محمد هم وايي چې سولې ته بايد لومړيتوب ورکړل شي.
دی وايي: «موږ باور لرو، چې په هره اندازه چې د سولې لپاره زیات کار وشي، هغې ته نږدې شو او دې کار ته لومړیتوب ورکړل شي، د ملت په خیر ده، په سوله کې به انتخابات هم په ښه شکل ترسره شي».
د ټاکنو خپلواک کمېسيون د راتلونکي کال د وري ۳۱مه د ولسمشريزو ټاکنو د ورځې په توګه اعلان کړې ده.
