همایون قیومي: افغانستان د اوکراین د مسئلې قرباني دی

د افغان حکومت یوه لوړپوړي چارواکي ویلي چې افغانستان د اوکراین د مسئلې قرباني شوی دی. د هېواد د مالیې سرپرست وزیر ډاکټر همایون قیومي په واشنګټن کې د خبرو پر مهال ویلي، چې افغانستان درې کاله کېږي چې د اوکراین د مسئلې قرباني شوی دی. دده په وینا له همدې امله روسیې په سیمه کې خپل رول بدل کړی دی او تر ډېره ورانکاره فعالیتونه کوي. قیومي دا نه دي ویلي چې افغانستان څه ډول د اوکراین د مسئلې قرباني شوی دی، خو د اوکراین ځینې سیمې د روسیې له لوري لاندې شوې دي او دې مسئلې د امریکا او روسیې ترمنځ اړیکې ترینګلې کړې دي. قیومي همدا راز سوله د افغانانو ستره هېله او هدف بللې ده. نوموړي زیاته کړې افغانستان ته هغه وخت تلپاتې سوله او ثبات راتللی شي، چې پاکستان د ترهګرو له ملاتړه لاس واخلي او په رښتینې توګه د افغانستان د سولې له پروسې سره همکاري وکړي.