ملي دفاع وزارت: د غزني په مالستان او جاغوریو کې عملیات پيل کېږي

ملي دفاع وزارت وایي د غزني د مالستان او جاغوري د پاکولو لپاره پراخ عملیات پيلوي. د ملي دفاع وزارت ویاند غفور احمد جاوید وايي، د پوځ لوی درستیز غزني ته رسېدلی دی او د پراخو عملیاتو د پلان پر جوړولو لګیا دی. دده په خبره څنګه چې پلان بشپړ شي پراخ تصفیوي عملیات به پیل او طالبان به وځپل شي. محمد شریف یفتلي هم ویلي، چې موخه یې په غزني کې د امنیت تامین دی. دده په وینا د پراخو عملیاتو لپاره پلان جوړ شوی دی او په عملي کېدو سره به یې د غزني امنیت ښه شي. وسله والو طالبانو له څو ورځو راهیسې د غزني په مالستان او جاغوریو کې جګړه پیل کړې ده. ویل کېږي چې ددې جګړو له امله سلګونه کسان له خپلو کورنو بېځایه شوې دي. همدا راز طالبانو، ملکي وګړو او افغان ځواکونو ته هم په دې جګړو کې مرګ ژوبله اوښتې ده. ددې جګړې په تړاو په څو ولایتونو کې لاریونونه هم وشول او د خلکو په امنیت کې د حکومت پر بې پروایۍ نیوکې شوې دي.