امریکا: د افغانستان په ولسمشریزو ټاکنو کې هېڅ راز مداخله نه کوو

امریکا وایي د افغانستان په ولسمشریزو ټاکنو کې هېڅ راز مداخله نه کوي. د امریکا د بهرنیو چارو وزارت ویاندې په یوه خبري کنفرانس کې ویلي امریکا د افغانانو په مشرۍ د سولې او مذاکراتو له پروسې ملاتړ کوي او په دې برخه کې هر پرمختګ ته هیله منه ده. د نوموړې په وینا امریکا هېڅ وخت له افغان حکومت د ټاکنو ځنډول نه دي غوښتي او نه هم په دې برخه کې مداخله کوي. هېدر ناورټ ویلي دا که افغان حکومت خپله سلا وګڼي چې تر ټاکنو مخکې سولې ته ورسېږي او یا د سولې لپاره ټاکنې وځنډوي د افغان حکومت خپل صلاحیت دی او امریکا په دې برخه کې هېڅ راز لاسوهنه نه کوي. نوموړې ټینګار کړی چې امریکا په افغانستان کې د دیموکراتیک نظام ملاتړې ده او له ټاکنو هم بشپړ ملاتړ کوي. دغه څرګندونې وروسته له هغه کېږي چې والستریت ژورنال په یوه راپور کې ویلي وو، امریکا هڅه کوي د سولې لپاره د افغانستان راتلونکې ولسمشریزې ټاکنې وځنډوي. خو افغان حکومت او اوس دغه دی امریکا دغه راپورونه رد کړل.