امریکا: له نظامي لارو د افغان شخړې د حل ملاتړي نه یو

امريکا وايي، دوى د افغانانو په مشرۍ د سولې پروسې ملاتړ کوي او په دې تګلاره کې یې کوم بدلون نه دى راغلى. د امريکا د بهرنيو چارو وزارت وياندې هيتر نورټ په واشنګټن کې خبريالانو ته ويلي چې زلمى خليلزاد د افغان سولې لپاره پوره هلې ځلې کوي. هغې زياته کړې، خليلزاد سيمې ته د سولې پر خپل دويم سفر بوخت دى او د هغه هڅې دا په ډاګه کوي چې امريکا په افغانستان کې د اوږدمهالې سولې لپاره ژمنه ده. نوموړې هيله څرګنده کړې چې امريکا به د افغان حکومت او طالبانو ترمنځ د سولې خبرو ته د اسانتياوو په رامنځته کولو کې بريالۍ شي. مېرمن نورټ ويلي، امريکا د افغان شخړې د نظامي هواري ملاتړې نه ده، زلمي خليلزاد د سولې او د شخړې د سياسي هواري لپاره سختې هلې ځلې پيل کړې دي. هغې د افغان سولې په اړه د روسيې د وروستيو هڅو هرکلى وکړ او ويې ويل چې دا د هغوى حق دى چې دا ډول هڅې وکړي. د مېرمن نورټ په وينا، امريکا نه یواځې د افغان ټاکنيزې پروسې ملاتړ کوي، بلکې په دغه بهير کې لاسوهنه هم نه کوي.