اسټین: د خپلو ګټو د دفاع لپاره هر لازم اقدام کوو

د امریکا د دفاع وزیر لوید اسټین ویلي چې هېواد به یې د خپلو ګټو د خوندیتوب لپاره له هیڅ لازم اقدام څخه مخ ونه ګرځوي. اسټین په عراق کې د امریکایي پوځیانو پر اډه وروستي توغندویي برید ته په اشارې ویلي چې د عراق حکومت باید پر عین الاسد پوځي اډه راکټي برید په جدي توګه وڅېړي. اسټین له اې بي سي نیوز سره په مرکه کې زیاته کړې چې د عراق حکومت باید د عین الاسد پېښه په جدي توګه وڅېړي او معلومه کړي چې مسوول څوک و. هغه ټینګار کړی دی چې له څېړنو وروسته به دوی په دې اړه لازم اقدامات وکړي. که څه هم په یاده پېښه کې ایران تورن بلل شوی دی خو ایران بیا په دې برید کې لاس لرل رد کړي دي.