افغان حکومت تازه د استانبول او مسکو په غونډو کې د ګډون لپاره تیاری ښودلی دی. د افغانستان د ملي امنیت شورا سلاکار حمدالله محب تېره ورځ په یوه خبري غونډه کې د خبرو پر مهال وویل، چې د ملي مصالحې عالي شورا او بهرنیو چارو وزارت دغو دواړو کنفرانسونو ته د پلاوو د لېږلو پر سر بحث کوي او دا به ټاکي چې په کومه کچه پلاوی دغو غونډو ته ولېږي. بلخوا ځينو افغان سیاسیونو د امریکا د سولې له نوې طرحې او دغه راز له جوړېدونکو کنفرانسونو ملاتړ کړی دی.
د افغانستان د څلوېښت کلنې جګړې د پای ته رسولو لپاره ظاهراً تازه هڅې پیل شوې دي. د دې هڅو په سر کې امریکا ده. د امریکا نوي حکومت ویلي، چې دوی له ټولو ممکنو لارو د افغانستان د روانې کشالې د حل په لټه کې دي. دوی ښايي دې پایلې ته رسېدلي وي، چې د دوحې اوسنی بهیر ناکام دی او پر بدیلو لارو یې فکر کول په کار دي. له همدې امله یې د افغانستان د سولې په مسئله کې ملګري ملتونه هم ور ښکېل کړل او تر څنګ یې د سیمې له هېوادونو هم غوښتي چې د افغانستان د جګړې په ختمولو کې هڅه وکړي.
اوس داسې ښکاري چې امریکا غواړي د سولې پروسه له خپل انحصاره وباسي او نړیوال دې ته راوبولي چې دغه کشاله نوره حل کړي. امریکايي ډيپلوماتان پر دې کار کوي چې له ملګرو ملتونو سره په ګډه په استانبول کې د افغان حکومت او طالبانو ترمنځ کنفرانس جوړ کړي. دلته بیا افغان سیاسیون او سیاسي محافل په بېلو بحثونو ګرم دي. ځينې افغان سیاسیون وایي، دا یوه ښه حللاره ده چې د اساسي قانون، اوسني یا راتلونکي حکومت او روان کړکېچ په اړه د نظر اختلافونه د نړیوالو په منځګړیتوب د افغانانو ترمنځ حل کړل شي، خو د افغان چارواکو په ګډون ځينې سیاسیون بیا په دې فکر دي چې دا به د بُن د کنفرانس په څېر یو بل ناکام کنفرانس وي، چې افغانستان ته به غمېزه راولي.
د دې ټولو هيلو او اندېښنو په منځ کې افغان سیاسیونو، طالبانو او افغان حکومت ته په کار ده چې د نړیوالو له لوري له رامنځ ته شوي فرصت ګټه پورته کړي. دا واقعیت دی چې افغان جګړه د کورني اړخ تر څنګ سیمهییز او ان نړیوال اړخ هم لري او ډېر داسې لوري شته چې دلته د جګړې پای ته رسېدل نه غواړي، خو په دې منځ کې د افغان سیاستوالو او هغو کسانو ځيرکانه لوبه افغانستان ژغورلی شي، چې دلته په رښتیني توګه د جګړې د پای ته رسېدو غوښتونکي دي.
د افغانستان په سیاسي بهیرونو کې فعالو شخصیتونو، ګوندونو او ټولنو ته هم په کار ده چې دا ځل دې فردي ګټې نه پالي، د افغانستان لپاره دې رامنځ ته شوی فرصت مهم وبولي او د ټول هېواد او افغان ولس د ګټو لپاره دې له تعصب او ځانغوښتنې پرته له نړیوالو سره په ګډه د افغان جګړې د پای ته رسولو او یوه پیاوړي او پرمختللي افغانستان لپاره کار وکړي.
