د ولسمشر د ملي امنیت سلاکار حمدالله محب وايي چې که له سولې مخکې بهرني ځواکونه له افغانستان څخه ووځي، نو په افغانستان کې به کورنۍ جګړې رامنځ ته شي. نوموړي پر طالبانو تور پورې کړی چې تاوتریخوالی یې زیات کړی او سوله نه غواړي. نوموړي دغه راز ویلي چې دوی د ترکیې غونډې ته پر چمتووالي بوخت دي.
افغان حکومت په داسې وخت کې دا څرګندونې کوي، چې تازه د امریکا ولسمشر جوبایډن ویلي تر مې میاشتې له افغانستان د ځواکونو وتل سخت دي. تر دې وړاندې ویل شوي وو چې د طالبانو او امریکا ترمنځ د بهرنیو ځواکونو د وتلو په برخه کې پر لنډ ځنډ بحث روان دی. داسې ویل کېږي چې ښايي دا پروسه درې میاشتې وځنډیږي. که څه هم طالبانو ویلي، چې دا کار د دوحې د هوکړې نقض دی، خو ویل کېږي چې که طالبانو ته د بندیانو د خلاصون، له تور لېسته د طالب مشرانو د نومونو ایستل او په ځینو نورو برخو کې امتیازات ورکړل شي، نو ښايي پر یو لنډ ځنډ هوکړه وکړي.
که طالبان دا ځنډ ومني، بیا هم امریکایي ځواکونه مجبور دي چې ووځي او دا هېڅکله د سولې پروسې د یو مخ لغوه کېدو مانا نه لري. له همدې امله حکومت او طالبان اړ دي چې یو له بل سره توافق وکړي. که بهرني ځواکونه ووځي او بین الافغاني توافق ونه شي، دا خبره جدي ده چې سخته کورنۍ جګړه به وشي. که څه هم موږ اوس په جګړه کې یو، خو تر دې به سخته، خونړۍ او پراخه جګړه وشي. دا حالت باید دواړه لوري درک کړي. که طالبان فکر کوي چې بهرني ځواکونه به ووځي او دوی به په زور هر څه وکړي، تېروتنه کوي، ځکه چې له امریکا پرته ګڼ نور سیمهییز هېوادونه هم شته چې د طالبانو پر ضد د جنګېدونکو کسانو سره به مرستې کوي. دا سمه ده چې طالبان به برلاسي وي، خو دا په دې مانا نه ده چې طالبان به خپل ټول مخالفین مات کړي. له بله اړخه که حکومت دا فکر کوي چې امریکایان به ونه وځي، تېروتنه کوي. امریکايي ځواکونه وځي، ښايي څو میاشتې ځنډ وکړي، خو بیا هم مجبور دي چې ووځي. حکومت به اوس پوره احساس کړې وي چې امریکا ورته یو مخ شا کړې او آن د امریکا ولسمشر په کابل کې د خپل سیال واکمن نوم هم نه دی زده او هغه ته کیاني وايي. له همدې امله پر امریکا حساب سم نه دی.
د جګړې دواړه اړخونه باید درک کړي چې دوی له بین الافغاني توافق پرته بله چاره نه لري. له بین الافغاني توافق پرته بله لاره یوه چټله کورنۍ جګړه ده چې ټول زیان یې افغان ولس ته رسېږي او هېڅوک به پکې بریالي نه شي. له همدې امله پکار ده چې دواړه اړخونه د خنډونو او ستونزو د جوړولو پر ځای ستونزې او خنډونه لرې کړي. دوی باید ټوله هڅه وکړي چې بین الافغاني توافق وشي او افغانستان ته سوله راشي. له دې پرته بهرني ځواکونه وځي او دواړه اړخونه هغسې جګړې ته روان دي چې هېڅ افغان یې نه غواړي.
