کرونا وبا لاهم په ګردې نړۍ کې د خپرېدو په حال کې ده، په ډېرو هېوادونو کې د دې وبا نوې څپې يوه پر بلې پسې پورته کيږي او پر رسنيو د ويروس د بدلون په اړه هم خبرونه ورکول کيږي. داسې ښکاري، چې نړۍ د کرونا وبا د ختمېدو لپاره لازياتو هڅو ته اړتيا لري. د نړۍ بېلابېل هېوادونه د دې وبا د مخنیوي په پار د کرونا ضد واکسين د تطبيق په هڅه کې دي او يو شمېر توان لرونکي هېوادونه د واکسين د توليدي توان د لوړولو په لټه کې دي.
چين څه موده مخکې اعلان وکړ، چې بهرنيو هېوادونو ته يې تر سلو ميليونو زيات د کرونا ضد واکسینونه برابر کړي دي. د دې خبر له خپرېدو څو ورځې وروسته، د دغه هېواد د روغتيا ملي کمېتې وياند مي فنګ د مارچ په ۲۸ مه نېټه په يوه مطبوعاتي غونډه کې وويل، چې چين په هېواد کې دننه خپلو خلکو ته تر سل ميليونو زيات دوزه واکسين تزريق کړی دی.
روغتياپوهان واکسين کول د کرونا وبا د مخنيوي لپاره تر ټولو اغېزمنه لاره بولي. په چين کې اوس ۵ ډوله د کرونا ضد واکسينونو ته د تطبیق اجازه ورکړل شوې، چې دغه شمېر تر نورو هېوادونو زيات دی. د دې ترڅنګ تر اوسه د دغو واکسينونو د سختو جانبي عوارضو پېښه نه ده رامنخته شوې او د کرونا ويرس د مخنيوي اغېزې او خونديتوب يې ثابت ښودل شوي دي.
د چين رسنۍ وايي، په دغه هېواد کې د کرونا ضد واکسین تولیدي تصدۍ اوس په ټول توان د دې واکسين د توليدي اندازې د زیاتولو په هڅه کې دي او په راتلونکې کې به د کرونا ضد نور واکسينونه هم بازار ته وړاندې کړي.
د چين د صنعت او تکنالوژۍ وزير شياو يا چينګ د مارچ په ۲۴ مه نېټه له رسنیو سره د مرکې پر مهال وويل، چې د تېرې فبرورۍ په لومړۍ نېټه، په دغه هېواد کې د کرونا ضد واکسین ورځنۍ تولیدي اندازه يو ميليون او ۵۰۰ زره دوزه ښودل شوې وه، خو اوس دغه اندازه پنځه ميلیونو دوزو ته لوړه شوې ده. نوموړي وويل، چې د چين حکومت له تصديو غوښتي، چې د واکسین خونديتوب ته لومړيتوب ورکړي او د واکسین د ډېر تولید ترڅنګ بايد کیفیت یې هم تضمین کړي. نوموړي زیاته کړه، چې د واکسين توليدولو تصديو ته یې کاري ډلې استولي، څو له دغو تصدیو سره د واکسین د توليد پراخولو پلانونه جوړ کړي.
د چين مشر او چارواکو څو څو ځلې ويلي، دغه هېواد به د کرونا ضد واکسين د عامه توليد په توګه بازار ته وړاندې کړي، څو بېلابېل هېوادونه په تېره بيا مخ پر ودې هېوادونه ورته لاسرسی ولري. د تازه شمېرنې له مخې، چين تراوسه له ۶۹ پرمختيايي هېوادونو سره د واکسین مرستې کړي او ۴۳ هېوادونو ته يې واکسینونه صادر کړي دي. دغه هېواد د روغتیا نړیوال سازمان تر مشرۍ لاندې د”کواکس“ په نوم د کرونا ضد واکسین د نړیوال تطبيق په پلان کې هم شامل شوی او د لس ميليونو دوزه واکسين د مرستې ژمنه يې ورسره کړې، څو د مخ پر ودې هېوادونو بېړنۍ اړتياوې پوره شي. په افغانستان کې د چين لوی سفیر وانګ يو څه موده وړاندې د افغانستان د عامې روغتيا له وزير سره د خبرو پر مهال وويل، چې هېواد به يې له افغانستان سره د ۴۰۰ زره دوزه واکسين مرسته وکړي.
