د ټولګټو وزارت چارواکي وايي، چې د روزګان ولایت مرکز اړوند بلاغ سیمه کې د ۳۴ میلیونه افغانیو په لګښت د یوه لوی پل چارې بشپړې شوې دي.
یاد وزارت وايي، چې دغه پل د ۷۲ متره اوږدوالي او ۷ متره سور تر څنګ ۱۴۶ متره د پُل ساتونکی دېوال هم لري، چې اوسمهال یې رغنیزې چارې بشپړې او نږدې راتلونکې کې به ګټې اخیستنې ته وسپارل شي.
د سرچینې په خبره، دا پل چې د روزګان ولایت مرکز ترینکوټ ښار له چارچینو او دهراوود ولسولیو سره نښلوي، رغنیزي چارې یې د حکومت په مالي لګښت د څه باندې ۳۴ میلیونه افغانیو په ارزښت له یوه خصوصي ودانیز شرکت سره تړون شوی، چې اوسمهال یې کار بشپړ او ګټې اخیستنې ته چمتو دی.
د یاد پُل د رغنیز کار په جریان کې د سیمو خلکو ته پر کارې بوختیاوو سربېره، به اوس د سیمې خلک وکولی شې تر څو خپل کرنیز محصولات په خوندي او تر پخوا په چټک ډول ترینکوټ ښار او له هغه ځایه د هېواد نورو ولایتونو ته ولېږدوي.
