په چين کې د مې له لومړۍ نېټې څخه تر پنځمې نېټې پورې د کارګرو نړيوالې ورځې په مناسبت پنځه ورځنۍ رخصتي ده. د چين د اوسپنيزو لارو ګروپ د شمېرنې له مخې، د دغې رخصتۍ په لومړۍ ورځ کې د دغه هېواد د هغو مسافرو شمېر چې په اورګاډو کې يې سفرونه کړي دي، ۱۸ مليونه او ۸۲۶ زرو تنو ته رسيدلي دي چې دا رقم د ۲۰۱۹ کال د همدې نېټې په پرتله ۹ اعشاريه ۲ سلنه د زياتوالي ښودنه کوي او د اورګاډو د مسافرو د ورځني شمېر ريکاډ يې مات کړی دی. د رخصتۍ په دوهمه نېټه د اورګاډو په وسيله د تګ راتګ کوونکو مسافرينو شمېر ۱۴مليونه او ۷۱۸ زرو تنو ته رسيدلی چې د ۲۰۱۹کال د همدې نېټې په پرتله ۱۱ اعشاريه ۶ سلنه زياتوالی پکې راغلی دی. له دغو شمېرو څخه معلوميږي چې د دغې رخصتۍ په موده کې د چينايانو د سفرونو لوړه څپه رامنځته شوې ده. ځکه په زياتره هېوادونو کې د کرونا وبا د وقايې او کنترول له امله د تګ راتګ په اړه محدوديتونه وضعه شوي دي، نو د هېواد په داخل کې سيلانيزو ځايونو ته سفرونه کول د چينايانو اصلي هدفونه دي او د رخصتۍ په موده کې د سيلانيز بازار د سمسورتيا له امله به دا په يوه موده کې د چين پر اقتصادي پرمختګ مثبتې اغېزې ولري. د شمېرنې له مخې، د چين په زياتره سيلانيزو سيمو کې د سيلانيانو شمېر د ۲۰۱۹ کال د همدې مودې له اندازې څخه لوړ شوی دی.
پر سيلانۍ برسيره، د فلمونو کتنه د دغې رخصتۍ په موده کې د زياترو وګړو انتخاب دی. د رخصتۍ په موده کې د بېلا بېلو موضوعاتو په اړه څه دپاسه ۱۳ نوي فلمونه د چين په سينماګانو کې نندارې ته وړاندې شوي دي چې دا رقم د تېرو رخصتيو په پرتله لوړ دی. د مې تر دوهمې نېټې پورې د دغو فلمونو د پلورل شويو ټکټونو ارزښت تر ۶۵۰ مليونو يوانو څخه اوښتی دی. د معلوماتو له مخې، له ۲۰۱۵ کال څخه تر ۲۰۱۹ کال پورې، په چين کې د کارګرو نړيوالې ورځې په رخصتۍ کې د فلمونو د پلورل شويو ټکټونو عايدات کال په کال زيات شوي او د زياتوالي کلنی انډول يې ۳۳ اعشاريه ۱۸ سلنه و.
د رخصتۍ په موده کې د چين په بېلا بېلو ځايونو کې په انلاين ډول د سوداګريزو شيانو د اخيستلو شمېر هم لوړ دی. د چين د پوسټ ملي ادارې د تازه شمېرنې له مخې، د مې په لومړۍ نېټه په دغه هېواد کې د چټک پوسټ له لارې د ليږل شوو بستو شمېر ۲۶۰ مليونو ته رسيدلی چې د تېر کال د همدې نېټې په پرتله ۳۰ سلنه زياتوالی ښيي. د دې تر څنګ، د مصارفو د هڅولو په اړه مختلف فعاليتونه روان دی. د چين د سوداګرۍ وزارت، د چين مډيا ګروپ او د شانګهای د حکومتي ادارې په کوربتوب د مصارفو د هڅولو مياشتې په نوم فعاليتونه د مې د لومړۍ نېټې په شپه پيل شوي او د مصارفو د هڅولو په مياشت کې به د هېواد په بېلا بېلو ځايونو کې شاو خوا ۱۳۰۰ اړوند فعاليتونه ترسره شي. په عين وخت کې د شانګهای د سوداګريزو توکو د اخيستلو فېستيوال پيل شوی او روان کال د دغه فېستيوال پيمانه د تېر کال په پرتله لويه ده. د شمېرنې له مخې، د مې د لومړۍ نېټې د شپې له اتو بجو څخه تر لسو بجو پورې د نوموړو فعاليتونو په اړه د سوداګريزو توکو د خرڅلاو اندازه له ۲ ميلياردو يوانو څخه اوښتې وه چې يو ځل بيا يې د چيني مشتريانو پياوړی مصرفي توان څرګند کړی.
د Morning Consult په نوم د سلا مشورو امريکايي شرکت د يو راپور له مخې، د چيني مشتريانو د باور شاخص د کرونا وبا له رامنځته کېدو مخکې سويې ته رسېدلی دی او په مارچ او اپريل کې د دغه شاخص له چټک لوړوالي څخه ښکاريږي چې د مصارفو څرګند او دوامداره زياتوالی به د دوهمې ربعې تر پايه پورې دوام ولري.
د چينايانو د مصارفو زياتوالی د دغه هېواد اقتصادي احيا د چټکېدو سبب ګرځېدلې ده او دا کار له دې سره تړلی دی چې چين د کرونا وبا د وقايې او کترول او د اقتصادي پرمختګ په دواړو برخو کې اغېزمن او برابر تدبيرونه نيولي دي، د مصارفو د هڅولو تګلارو په دوامداره توګه اغېزې رامنځته کړي، د خلکو د عايداتو د دوباره زياتوالي له امله مصرفي توان لوړ شوی دی او د لګښتونو د چاپيريال له پر له پسې ښه والي سره د مشتريانو باور لا ټينګ شوی دی.
په چين کې د کارګرو نړيوالې ورځې په رخصتۍ کې له سمسور مصرفي بازار څخه دا ښکاريږي چې د چين اقتصاد د کرونا وبا له منفي اغېزو څخه وتلی او اوس د چټکې احيا په حال کې دی. د نړۍ د دوهم لوی اقتصادي ځواک په توګه د چين اقتصادي پرمختګ د نړيوال اقتصاد په دوباره سمسورتيا کې مثبت رول لوبوي.
