تېر ۲۴ ساعته؛ کرونا په هند کې ۳۷۸۰ کسان مړه کړي دي

هندي رسنیو راپورونه ورکړي دي چې په تېرو ۲۴ ساعتونو کې په دغه هېواد کې پر کرونا وبا اخته ۳۷۸۰ کسان مړه شوي دي. د هند روغتیایي چارواکو ویلي چې په همدې موده کې د کرونا ویروس ۳۸۰ زره مثبتې پېښې هم ثبت شوې دي چې ورسره پر دغې وبا د اخته کسانو شمېر تر ۲۰ میلیونه اوښتی دی. په هند کې د کرونا وبا د تازه څپې له خپرېدو سره په دغه هېواد کې د کرونا ویروس له امله ورځ تر بلې د مړو او ناروغانو شمېر زیاتېږي چې د خلکو تر څنګ یې د هند دولت هم له ننګونو سره مخ کړی دی. د ویلو ده چې په هند کې د کرونا ویروس له ډېرېدو وروسته، د کرکټ ای پي ایل سیالۍ هم تر نامالومې نېټې پورې ځنډ‌ېدلې دي.