اسټرالیا وايي چې تر راتلونکې جمعې پورې په کابل کې خپل سفارت تړي. د اسټرالیا لومړي وزیر سکاټ موریسن ویلي چې د نامعلوم امنیتي حالت له امله دا پرېکړه کوي. په کابل کې د اسټرالیا سفارت وایي، هیله ده حالت ښه شي او دوی بېرته کار پیل کړي. افغان حکومت هم وايي، له دې پرېکړې خبر دی، درناوی یې کوي او هیله لري چې دا کار لنډمهاله وي او دا سفارت بېرته خپل کار پیل کړي. حکومت وايي چې د ډیپلوماتو او سفارتونو امنیت ته پام کوي او طالبانو هم ویلي چې د دوی له خوا ډیپلوماتانو ته کوم ګواښ نشته شته او هغوی دې اندېښنه نه کوي.
دا لومړی ځل دی چې اسټرالیا له شلو کلونو وروسته په افغانستان کې خپل سفارت تړي. تر دې وړاندې د اپرېل میاشتې په وروستیو کې د امریکا د بهرنیو چارو وزارت هم په کابل کې د خپل سفارت هغو کارکوونکو ته له افغانستان څخه د وتلو امر کړی و چې له بهر څخه خپل کارونه کولی شي. داسې رپوټونه شته چې ډېرو سفارتونو له وړاندې خپل کارکوونکي محدود کړي، تګ راتګ یې کم کړی او امنیتي تدابیر یې زیات کړي دي. داسې وېره ده چې له اسټرالیا وروسته به ځیني نور هېوادونه هم داسې ګامونه واخلي.
د بهرنیو سفارتونو او قونسګریو تړل کېدل، د ډیپلوماتانو کمول او د نورو سیاسي رسمي استازولیو بندېدل به افغانستان یو ځل بیا له ډیپلوماتیکي انزوا سره مخ کړي. دا هغه حالت دی چې افغانانو د تنظیمي جګړو او بیا د طالبانو د واکمنۍ پر مهال تجربه کړی دی. دغه حالت افغانان داسې منزوي کړي وو چې نه یوازې د افغانستان پر سیاسي دریځ، اقتصاد او پرمختګ یې نه جبرانېدونکی منفي اغېز وکړ، بلکې افغانان یې په نورو هېوادونو کې له ذلت او خواریو سره مخ کړل. اوس چې اسټرالیا هم وايي سفارت تړي، خو کارکوونکي به یې خپل کارونه د سیمې په نورو هېوادونو کې کوي، دا د دې مانا لري چې افغانان به بیا بهرنیو هېوادونو ته د تګ لپاره زموږ ګاونډیو هېوادونو ته ورځي او هلته به د ګاونډیو ناوړه چلند زغمي. افغانان به بیا اسلاماباد ته ورځي، پاکستاني پولیس او نظامیان به ورسره زیاتی کوي او دوی به هلته د خپل قانوني کارونو لپاره رشوت ورکوي، ذلت به تېروي او ځوریږي به.
د افغانستان ډیپلوماتیکه انزوا، په کابل کې د سفارتونو تړل کېدل او سیمې ته یې لېږدول د اسلاماباد او د افغانانو د نورو دښمنانو هغه هیله ده چې له بده مرغه اوس خپله د ځینو افغانانو په لاس پوره کېږي. په کابل کې کمزوری، فاسد او بې کفایته حکومت، د طالبانو بېځایه او وروستۍ نامشروع جګړه؛ هغه کړنې دي چې موږ افغانان یې کوو او د دښمن هیله پوره کوو. که حالت همداسې وي، جګړه وي، د سولې خبرې ورکې وي، اشرف غني او ټیم یې د سولې په چاره کې خنډونه جوړوي، شرطونه ږدي او سرې کرښې کاږي؛ که طالبان همداسې له افغانانو سره جګړې ته دوام ورکوي، تکبر کوي، نور نه مني او یوازې هغه څه مني چې دوی یې سم ګڼي، نو افغانان به بیا په واقعي مانا ډیپلوماتیکي انزوا او ذلت ته ولاړ شي. بیا به مسوولیت د دوی وي او په هېڅ ډول به بیا دا خیانت توجیه نه شي کړلی.
