پرون له کابل څخه د افغان حکومت د مذاکراتي ټیم ځیني غړي د خبرو د بیا پیل لپاره دوحې ته ولاړل او پاتې غړي به هم په څو ورځو کې دوحې ته ورشي. حکومت وايي چې پلاوی یې له تیارۍ سره دوحې ته ورغلی او طالبان هم وايي چې دوی له وړاندې خبرو ته تیار دي او خبرې په ژر وشي. معلومه نه ده چې د خبرو اجنډا به څه وي؟ له کومه ځایه به پیل کېږي او دا خبرې به له پخوانیو خبرو سره څه توپیر ولري؟
د افغان دولت پلاوی په داسې وخت کې قطر ته ورځي چې په دواړو اړخونو پراخ کورني او بهرني فشارونه دي چې د سولې خبرې بیا پیل کړي او جګړه کمه کړي. د جګړې په دې شدت کې د سولې د خبرو پیل خو به یا یوازې دغو فشارونو ته یو ډول ځواب وي او یا به هم دا خبرې پر جګړه اغېز ولري، تاوتریخوالی به ورسره کم شي او په خبرو کې به مثبت پرمختګ وشي. د ښکېلو اړخونو له کړنو او دریځونو ښکاري چې دوی یوازې غواړي چې فشارونو ته ځواب ووايي او نور تیار نه دي چې د سولې په خبرو کې مثبت پرمختګ وشي. د خلکو تمه بیا دا ده چې دا نور د خبرو او عملي کړنو ترمنځ واټن ختم شي، دواړه اړخونه دې جدي او پرېکنده خبرې وکړي. دا ځل خبرې باید یوازې د وخت د ضایع کېدو او د فشارونو د کمېدو په موخه نه وي. دا ځل خبرې دې د پرمختګ، توافق او سولې ته د رسېدو لپاره وي. دواړه اړخونه دې د ستونزمنو او پېچلو مسایلو پر ځای پر هغو مسایلو خبرې او بحث وکړي چې په اسانۍ توافق پرې کېدلی شي. د خبرو له پیل سره سم باید تاوتریخوالی کم شي، په خبرو کې له پرمختګ سره باید تاوتریخوالی نور هم راکم شي او یو اساسي پرمختګ باید اوربند ته لاره هواره کړي. که ښکېل اړخونه پر داسې مسایلو تمرکز وکړي چې دواړه اړخونه په اسانۍ پرې توافق کولی شي، نو د پرمختګ تمه هم کېدلی شي، خو که ښکېل اړخونه د پخوا په شان په لانجمنو او سختو مسایلو بحث کوي او بیا پر خپلو دریځونو هم ټینګار کوي او آن درېیمه او منځنۍ حللاره هم نه مني، نو بیا نه په خبرو کې د پرمختګ چانس شته او نه هم د خلکو هیلې پوره کېدلی شي.
دواړو اړخونو ته پکار ده چې نور د بې وزلو افغانانو درد او غم ته وګوري او زیات یې نه کړي. د جګړې اوږدول او د سولې په لاره کې خنډول باید نور ودرول شي. پکار ده چې پر ولس رحم وکړي او دواړه اړخونه دا ځل د سولې لپاره جدي، صمیمي او پرېکنده خبرې وکړي. دا ځل باید وخت ضایع نه شي، خبرې باید رغوونکې وي او پایله ولري. که دا ځل هم د تېر به شان وخت ضایع کېږي او یوازې د خلکو سترګو کې خاورې شیندل کېږي، نو بیا به دواړه اړخونو د خلکو پر وړاندې پړه وي او دوی به د ټولو هغو وژنو ځواب وايی چې د روانې جګړې له امله رامنځ ته کېږي.
