امریکا د افغانستان په ګډون؛ ګڼو هېوادونو ته کرونا ضد واکسین ورکوي

د امریکا حکومت اعلان کړی چې د روانې جون میاشتې تر پای پورې به نړۍ ته ۸۰ میلیونه نور د کرونا ضد اضافي واکسین ورکوي. د امریکايي چارواکو په وینا په هغو هېوادونو کې چې دا واکسین به ورکول کیږي افغانستان هم شامل دی. امریکايي چارواکي وايي د یو ځانګړي پلان له مخې به د دغو ۸۰ میلیونه دوزه څخه ۲۵ میلیونه دوزه هغو سیمو ته ورکړل شي چې واکسین ته ډېر ضرورت لري. له دغې ډلې څخه به یې شاوخوا اووه میلیونه دوزه اسیا ته ورکول کیږي چې افغانستان،‌ پاکستان،‌ بنګله دېش، هند، سريلانکا، اندونیزیا، لاوس، مالیزیا، مالدیف، نیپا، پاپوانیوګیني، د پاسفیک ټاپوګان، فلپین، تایوان، تایلنډ او ویتنام په کې شامل دي. دغه راز د امریکا د دغو اتیا میلیونه دوزه واکسین څخه به ۱۹ میلیونه دوزه د کم او منځني عاید لرونکو هېوادونو ته ورکول کیږي.