د خبريالانو د خونديتوب لپاره انلاين سيستم فعاله شو چې له مخې يې خبريالان کولاى شي د پېښو پرمهال د يوې تڼۍ په کېکاږلو سره ډېر ژر له اړوندو ارګانونو سره اړيکه ټينګه کړي.
دغه سيستم پرون په کابل کې د يوې خصوصي کمپنې له لوري اعلان شو.
د دې کمپنې يو تن مسوول آغا ملوک سهار خبريالانو ته وويل چې له دغه اپلېکېشن څخه د خبريالانو ترڅنګ د رسنيو نور کارکوونکي هم کولاى شي ګټه پورته کړي.
نوموړي زياته کړه: «خبريالان بايد دغه سيستم په خپل ځيرک مبايل کې فعاله کړي چې د ګواښ پرمهال دوى کولاى شي د يوې ټنۍ په کېکاږلو سره له خپلې ادارې او يا هم پوليسو سره اړيکه ټينګه کړي».
د سهار د معلوماتو له مخې دغه سيستم د خبريالانو دقيق موقعيت په ګوته کوي او د ځينو نورو ځانګړنو ترڅنګ کله چې خبريال له خوندي ساحې (ګرين زون) څخه ووځي نو اړوندو ادارو ته خبر ورکول کېږي.
نوموړى زياتوي چې دغه سيستم د شپږو مياشتو په موده کې د رسنيو له چارواکو سره په مشوره جوړ شوى دى.
د ده په وينا، خبريالان بايد اول دغه اپلېکېشن په خپلو ټيلېفونونو کې ډانلوډ کړي بيا تر هغه وروسته ګټه ترې پورته کولاى شي.
د خبريالانو د خونديتوب دغه سيسټم په داسې مهال فعالېږي چې يوازې روان کال کې ١٢ خبريال وژل شوي او لسګونه نور ټپيان شوي دي.
