مولانا سمیع الحق هغه مهال وژل شوی چې غوښتل یې د افغان سولې په برخه کې همکاري وکړي. د مولانا سمیع الحق زوی حامد الحق په یوه خبري کفنرانس کې ویلي، پلار یې د طالبانو له ټولو اړخونو سره خبرې روانې کړې وې، پر دوی یې ډېر کار کړی و او ددغه ډلې مشران یې سولې ته هڅولي وو. د حامد په وینا پلار یې غوښتل چې د افغانستان د سولې په برخه کې مرسته وکړي او د همدې منډو ترړو پر مهال وژل شوی دی. هغه د یوې پوښتنې په ځواب کې ویلي، دا سمه ده، چې پلار یې د طالبانو معنوي ملاتړ کاوه، خو په دې وروستیو کې یې هڅه پيل کړې وه، چې دغه ډله له افغان حکومت سره د سولې خبرو ته حاضره کړي او د طالبانو له ګڼو مشرانو سره یې خبرې اترې لرلې دي. حامد الحق د خپل پلار پر پلویانو غږ کړی چې د هغه لار تعقیب کړي او د قاتلینو په نیولو کې یې همکاري وکړي. نوموړي تور پورې کړی چې سمیع الحق د بهرنیو استخباراتي کړیو له لوري وژل شوی دی خو دغه کړۍ یې نه دي په ګوته کړې. سمیع الحق په پاکستان کې له مشهورو ملایانو و، چې په افغانستان کې یې جګړه جهاد بلله او ددغه جګړې په ملاتړ یې تبلیغ کاوه.
