امریکا ته د ولسمشر غني له سفر او را ګرځېدو وروسته خلک لا هم نه پوهېږي چې افغانستان کوم لوري ته روان دی او څه پېښېدونکي دي. تمه وه چې امریکا ته به د افغان چارواکو په سفر کې د سولې په اړه یو نوی او واضح تصویر پیدا شي، خو له دې سفر وروسته هم د سولې تصویر تت دی او د جګړې په برخه کې هم داسې څه نه ښکاري چې شته حالت دې پرې بدل شي. له همدې امله اندېښنې شته او خلک پوښتي چې حالاتو ته د ځواب ویلو لپاره به د حکومتي چارواکو بل ګام څه وي؟
امریکا ته د افغان چارواکو په سفر کې داسې څه نشته چې حکومت دې یې پر اساس کومه نوې لاره غوره کړي. د سولې پروسه ورکه ښکاري او په دې برخه کې د کوم تحرک څرک هم نشته. نه طالبان، نه حکومت او نه هم کوم بل اړخ د سولې په خبرو کې د تحرک لپاره هڅه کوي او داسې ښکاري چې امریکا ته هم نوره دا پروسه مهمه نه ده او په دې اړه پر ښکېلو اړخونو فشار نه راوړي. له بله اړخه طالبان همغسې پرمختګ کوي، جګړه روانه ده او د افغانستان له لویې برخې د جګړې او نښتو خبرونه ورکول کېږي. طالبانو وړمه شپه هم پنځه ولسوالۍ نیولې وې او ښکاري چې دا لړۍ به همداسې روانه وي. حکومت چې د ولسوالیو د سقوط د مخنیوي لپاره کومې ژمنې کړې وې، نه دي عملي شوي او د ولسوالیو د بېرته نیولو پروسه هم تر ډېره کمزورې، نمایشي او ورو ده. د ولسوالیو د بېرته نیولو او یا د طالبانو د پرمختګ لپاره د ملېشو جوړولو لړۍ هم روانه ده، خو دا لړۍ له همدې پیله د عامو خلکو، سیاستوالو او آن په دولت کې دننه د ځینو اړخونو له مخالفت سره مخ شوې ده. په دې ډول حکومت نه په سوله کې او نه هم د طالبانو د پرمختګ د مخنیوي لپاره کوم کارنده پلان او ابتکار لري. له وروستیو بدلونونو ښکاري چې جګړه به روانه وي، طالبان به ښايي نورې ولسوالۍ ونیسي او خبره تر ولایتونو هم رسېدلی شي. حکومت له نظامي اړخه په ښه حالت کې نه دی او له امریکايي چارواکو یې هم داسې څه نه دي تر لاسه کړې چې پر هغو تکیه وکړي. له همدې امله کوم نوی پلان او پروګرام نشته.
اوس هغه وخت دی چې مسایلو ته په خلاصو سترګو وکتل شي، د امریکا په ګډون په نورو بهرنیانو تکیه ونه شي. اوس هغه وخت چې نور د جګړې فکر له سره و ایستل شي. دواړه اړخونه په اخلاص او صداقت د سولې خبرو ته ننوځي، سرې کرښې باید نورې ختمې شي. دواړه اړخونه باید یو له بل سره مخامخ خبرې ژر پیل کړي. د دې خبرو پر وړاندې که هر خنډ وي، هغه باید لرې شي. که طالبان د بندیانو خلاصون غواړي، دا کار باید ژر وشي او ورسره دې طالبان جګړه هم و دروي. که د سولې خبرې همدا اوس ژر پیل نه شي، خنډونه لرې نه شي، نو بیا وېره ده چې ښايي دواړه اړخونه یوې داسې جګړې نه ننوځي چې ترې راوتل سخت وي او بیا به هر لوری د بل د نابودۍ فکر کوي او د سولې چانس به ضایع شوی وي.
