معتبرې سرچینې:  د ولسمشرۍ راتلونکې ټاکنې درې میاشتې ځنډېدلې دي

یادې سرچینې چې نوم یې نه دی په ډاګه شوی ویلي، د ولسمشرۍ ټاکنې به د ۱۳۹۸کال د سرطان میاشتې په ۲۲ نېټه تر سره شي. وړاندې تر دې د ټاکنو کمیسیون اعلان کړی و چې راتلونکې ولسمشرۍ ټاکنې د حمل یا وري میاشتې په ۳۱ نېټه کېږي. د سرچینې د معلوماتو له مخې ټاکنو کمیسیون پرېکړه کړې چې د ولسمشرۍ راتلونکې ټاکنې، د ولایتي او ولسوالۍ شوراګانو ټاکنې به یو ځای د ۱۳۹۸ کال د سرطان میاشتې په ۲۲ نېټه وشي. د تازه مهالوېش له مخې ویل کېږي چې نوماندان کولی شي د جدي میاشتې له ۱۱مې د دلوې میاشتې تر ۸ نیټې پورې خپل نومونه ثبت او د ثور میاشتې له ۲۲مې د سرطان تر ۲۰ پورې خپلو انتخاباتي مبارزو ته دوام ورکړي. دا په داسې حال کې ده چې وړاندې تر دې یو ځل داسې اوازې خپرې شوې چې امریکا هڅه کوي افغان حکومت د ټاکنو پر ځنډ راضي کړي خو افغان حکومت په وار وار وویل چې دوی به د هیچا په خوښه هم راتلونکې ټاکنې ونه ځنډوي. چې وروسته بیا د امریکا د بهرنیو چارو وزارت ویاندې وویل افغان ټاکنو کې هر ډول احتمالي تغییر د افغان حکومت کار دی او دوی په دې پروسه کې هیڅ لاسوهنه نه کوي.