له فراه څخه د ولسي جرګې ځينې معترض نوماندان وايي، د دغه ولايت ټاکنې دې باطلې او له غزني ولايت سره يو ځای ترسره شي؛ ځکه چې پراخې درغلۍ په کې شوې دي.
له فراه څخه ٤٢ تنه د ولسي جرګې ټاکنو ته نوماند شوي وو. د ټاکنو کمېسيون له دې ډلې بلقيس روشن، عبدالجليل بختور، همايون شهيدزاده، عبدالستار حسيني او عبدالنصير فراهي مخکښ نوماندان اعلان کړي دي. دغه پنځه کسان ټول نوې څېرې دي او تر دې مخکې يې د يادې جرګې غړيتوب نه درلود.
پرون شاوخوا شلو تنو چې ځينې يې له فراه څخه ولسي جرګې ته نوماند او ځينې د نورو نوماندانو استازي وو، کابل کې ګډه خبري ناسته جوړه کړې وه.
له دغو معترضو نوماندانو څخه محمد سرور فراهي وويل، چې د ناامنيو له امله د فراه له لسو ولسواليو څخه په شپږو کې يوازې ۱۲ رايې کارول شوې او د ټاکنو په ورځ د رايې ورکولو ډېری مرکزونه له ټاکل شوي ځای څخه بل ځای ته لېږدول شوي وو.
يادو کسانو په دغه ولايت کې په ټاکنو کې د فساد په تړاو ځينې انځورونه او ويډيوګانې هم رسنيو ته ورکړې.
په دغو ويډيوګانې کې ظاهراً ښکاري چې يو تن يو رايه ورکوونکى خپل نوم حامد ښيي، خو په تذکره کې يې نوم نثار احمد دى او په بله ويډيو کې ښکاري چې يو ١٦ کلن هلک رايه ورکوي.
په بله ويډيو کې ښکاري چې صندوقونه د پوليسو په رنجر موټر کې لېږدول کېږي، يو کس وايي چې د صندوقونو سرونه نه دي قفل شوي او رايې نه دي شمېرل شوې.
له فراه څخه ولسي جرګې ته بل متعرض نوماند عبدالناصر فراهي وويل چې د ټاکنو کمېسيون بايد د دغو اسنادو په پام کې نيولو سره د فراه خلکو او د هغوى استازو ته په دغه ولايت کې د رڼو ټاکنو په اړه قناعت ورکړي.
دی زياتوي چې کمېسيون بايد تورې او سپينې رايې سره بېلې او د ملت کور ته د رڼو رايو لرونکي کسان ولېږي.
ده چې د نورو په استازيتوب يې خبرې کولي وويل چې د فراه ټاکنې دې باطلې اعلان او په غزني کې د ولسي جرګې او دغه راز د ولسمشريزو ټاکنو سره دې يو ځاى تر سره شي.
نږدې يوه مياشت مخکې يوه چورلکه چې له فراه څخه هرات ته پر لاره وه، ولوېده. د راپورونو له مخې په دې چورلکه کې چې ٢٧ تنه په کې مړه شول، د فراه د ټاکنو اړوند ځينې توکي سوځېدلي، خو د ټاکنو کمېسيون ويلي چې په دې پېښه کې د رايو صندوقونه نه دي سوځېدلي.
د ټاکنو کمېسيون وايي چې په دې پېښه کې د ټاکنو د پايلو د جدولونو د کاپي محافظتي کڅوړې سوځېدلې چې د ټاکنو پر پايلو کوم اغېز نه لري.
د اعتراض کوونکو په پرېکړه ليک کې د ټولو درغليو پر څېړلو د ټينګار تر څنګ راغلي چې د چورلکې د لويېدو په پېښه کې د ټاکنو د بايومټريک دستګاوې سوځېدلې چې بايد په اړه يې تصميم ونيول شي.
