وړمه شپه د لښکرګاه ښار او نادعلي ولسوالۍ تر منځ د باباجي د شملان په سیمه کې د جګړې پر مهال دوه ملکي وګړي وژل شوي او ۱۴ نور ټپیان دي.
د سیمې اوسېدونکي وايي چې ملکي مرګ ژوبله د هوايي بریدونو په پايله کې اوښتې ده.
د سیمې اوسېدونکو رسنيو ته ويلي، ځانګړو ځواکونو غوښتل چې د لوی مانده په سیمه کې نظامي عملیات وکړي چې وسله والو طالبانو پرې برید کړی او په دې توګه الوتکو پر سیمه بمونه غورځولي دي.
د هلمند د والي ویاند عمر ځواک ملکي وګړو ته د مرګ ژوبلې اوښتل تاييدوي، خو وايي معلومه نه ده چې دا مرګ ژوبله د هوايي او که راکټي بريد له کبله اوښتې ده.
ځواک وايي چې د باباجي د سپین مسجد، کوپکې او لوی مانده په سیمو کې د افغان ګډو ځواکونو له لوري نظامي عملیات له تېرو څو ورځو راهیسې دوام لري.
دی زياتوي: «په عملیاتو کې ۱۷ تنو وسله والو طالبانو ته مرګ ژوبله اوښتې، خو ملکي کسان چې ښځې او ماشومان هم پکې شامل دي او شمېر يې ۱۴ تنو ته رسېږي ټپیان شوي او ۲ تنه نور ملکي کسان وژل شوي. د هلمند والي د پېښې د څرنګوالي لپاره پلاوی ټاکلی او وروسته به معلومه شي چې ملکي مرګ ژوبله په هوايي بریدونو کې رامنځته شوې او که په ځمکنیو نښتو کې او عاملین يې څوک دي».
ځواک وايي چې وسله والو طالبانو د ملکي خلکو له کورونو څخه پر ګډو ځواکونو بریدونه کول چې تر برید لاندي راغلي.
په پېښه کې ټپي شوي ملکي کسان په لښکرګاه ښار کې د ایمرجنسي روغتون ته انتقال شوي.
د هلمند د عامي روغتیا ريیس ډاکتر امین الله عابد وايي چې په ټپیانو کې ښځې او ماشومان هم شامل دي، خو کره شمېر يې نه ده ښودلې.
نوموړي په ټپیانو کې د ځینو روغتیايي حالت نازک ښودلی دی.
باباجي د لښکرګاه ښار د څلورمې حوزې او نادعلي ولسوالۍ ځينې برخې سره نښلوي چې د هلمند د مرکز لښکرګاه ښار تر ټولو نا امنه سیمه بلل کېږي.
