له غزني ترلاسه شوي رپوټونه وایي، د ګېلان ولسوالۍ په مرکز جنډه کې پرون بيا لاريونونه شوي دي.
لاریونوال پر حکومت تور لګوي چې دوه ګونی چلند ورسره کوي او په جاغوري او مالستان کې د طالبانو د بریدونو غچ له دوی اخیستل کېږي.
پارېدلو خلکو پرون تر غرمې مخکې د کابل – کندهار لویه لاره د ټرافیکو پرمخ تړلې وه. دغه لاره د شنبې پر ورځ هم د څو ساعتونو لپاره تړلې وه.
د غزني د والي ویاند عارف نوري وايي، د جاغوري له جګړې څخه وسله وال د ګيلان ولسوالۍ رسنۍ سیمې ته تښتېدلي او افغان او بهرنیو ځواکونو هلته پرې هوایي بريدونه کړي.
نوموړی مني چې په دغو بريدونو کې ملکي وګړو ته هم مرګ ژوبله اوښتې چې په وينا یې خلکو يې په غبرګون کې پر لاريونونو لاس پورې کړی دی.
د والي ویاند وایي، اوس په ګيلان کې هوایي او چاڼیز عملیات درول شوي، ځکه وېره وه چې ولسي وګړو ته به نوره مرګ وژبله هم ور واوړي.
ځايي خلک بيا وايي چې افغان ځواکونه له تېرو څو ورځو راهیسې د غزني له مرکز او له جاغوري ولسوالۍ د ګيلان پر لور د توپونو ډزې کوي.
د ګيلان د اوسېدونکو په پروني لاريون کې زرګونو تنو ګډون کړی و او خبرداری يې ورکړ چې که يې غوښتنو ته پام ونه شي نو تر دې پر سختو اقداماتو به لاس پورې کړي.
د غزني د والي ویاند وایي، سیمه ییزو چارواکو له لاريونوالو سره خبرې کړې او ډاډ یې ورکړی چې هلته به د ولسي وګړو د وژنې او د روان وضعیت په اړه جدي پلټنې کېږي.
نوموړی زیاتوي چې تر دې خبرو وروسته د سیمې خلکو احتجاج ختم کړی او د کابل – کندهار لاره اوس بېرته پرانیستل شوې ده.
