په کابل کې د هند سفیر ویني کمار وايي چې د افغانستان او هند ترمنځ د ستراتیژیکو همکاریو د تړون له مخې له افغانستان سره د هند مرستې ډېرې شوې او نوی ډيلی ژمن دی چې خپلو مرستو ته دوام ورکړي.
کمار چې پرون یې په کابل کې د افغانستان او هند د امنیتي خبرو اترو په څلورمه ناسته کې خبرې کولې، وویل: «که څه هم زموږ په شاوخوا کې ډېر څه روان دي، خو د افغانستان لپاره د هند بنسټیزه تګلاره دا ده چې د یو خپلواک افغانستان له حکومت سره مرسته وکړي، تر هغه چې افغان حکومت زموږ سره همکار وي، موږ به هم د افغانستان او د دغه هېواد د خلکو د باور وړ همکار پاتې شو».
په کابل کې د هند سفیر همدارنګه وویل چې دوی د افغانانو په مشرۍ او مالکیت د سولې د خبرو اترو ملاتړ او هرکلی کوي.
د افغانستان او هند د امنیتي خبرو اترو څلورمه ناسته د افغانستان د ستراتیژیکو مطالعاتو او د هند د امنیتي او دفاعي خدمتونو د انسټېټیوټونو له خوا جوړ شوې وه چې پکې له ترهګرۍ سره د مبارزې په برخه کې د هند او افغانستان تجربې شريکې شوې.
د ستراتیژیکو مطالعاتو د انسټېټیوټ مشر ډاکټر داود مرادیان وايي، دوی پر دې بحث کوي چې څنګه د افغانستان، هند او امریکا په ګډون یو ائتلاف رامنځته کړي، څو له ترهګرۍ سره په ګډه مبارزه وکړي.
مرادیان وویل: «موږ له یوې دولتي ترهګرۍ سره مخ یو چې له پاکستانه سرچینه اخلي چې دا ترهګري هم د افغانستان ملي امنیت ته ګواښ دی او هم د هند. موږ باید په ګډه د دغه ګډ دښمن پر وړاندې له یو بل سره همکاري وکړو».
د افغانستان او هند د امنیتي خبرو اترو لومړۍ ناسته د ۲۰۱۶ ز کال په مارچ کې د هند په پلازمېنه نوي ډيلي کې جوړه شوې وه. دويمه ناسته یې د ۲۰۱۶ ز کال په اکټوبر کې په هرات کې جوړه شوې وه او درېیمه ناسته يې د ۲۰۱۷ ز کال په سپټمبر کې په ډيلي ښار کې جوړه شوې وه.
