د چين د کمونېست ګوند او د نړۍ د سياسي ګوندونو انلاين سرمشريزه غونډه د روان کال د جولای په ۶مه نېټه تر سره شوه. د چين کمونېست ګوند عمومي منشي او د دولت رئيس شي جين پينګ له بېجينګ څخه په انلاين ډول په ياده غونډه کې ګډون او د سياسي ګوندونو په همکارۍ خلکو ته د نيکمرغه ژوند د راوړلو تر سرليک لاندې يوه وينا وکړه.
د کرونا وبا د خپرېدو په درشل کې دا يوه بې سارې سرمشريزه غونډه بلل کيږي، چې د څه دپاسه ۱۶۰ هېوادونو د سياسي ګوندونو يا سازمانونو څه باندې ۵۰۰مشرانو او کابو لس زرو استازيو پکې ګډون کړی و او له ۲۰ نه زياتو دولتي يا حکومتي مشرانو پکې ويناوې وکړې. دغه سرمشريزه غونډه ” خلکو ته د نیکمرغه ژوند راوړل، د سياسي ګوندونو دنده ده“ تر سرليک لاندې ترسره شوه.
د چين د کمونېست ګوند د مرکزي کمېسيون عمومي منشي او د دولت رئيس شي جين پينګ يادې سرمشريزې غونډې ته په خپلو خبرو کې وويل، چې د چين کمونېست ګوند له تېرو سلو کلونو راهيسې د چينايانو په يووالي او اتحاد او په نه ستومانه کېدونکو کوښښونو چيني ملت ته پر له پسې پرمختګ ورکړی دی. د چين کمونېست ګوند په دې اند دی، چې چينايان له نړيوالو سره ګډ برخليک لري او تل يې له نړيوالو حالاتو او زماني تمايل سره سم د چين پرمختيايي لوری ټاکلی او د مختلفو هېوادونو د ګډې سمسورتيا هڅې يې کړي دي.
شي جين پينګ: نن ورځ انسانان په يوې تاريخي څلور لارې کې ولاړ دي او انتخابونه زموږ په لاسونو کې او دندې مو پر اوږو دي.
نوموړي په خپلو خبرو کې څو وړانديزونه وکړل:
لومړی، موږ دې د راتلونکي پرمختيايي لوري لارښوونه وکړو او د انسانانو ګډه اينده دې اباده کړو.
دوهم، موږ دې د لا زياتو موافقو د تر لاسه کولو هڅې وکړو، د سولې، پرمختګ، عدالت، مساوات، ديموکراسۍ او ازادۍ په شمول د انسانانو پر ګډو نظريو دې ټينګار وکړو.
درېيم، موږ دې د پرمختګ د هڅونې دنده پر غاړه واخلو، څو د مختلفو هېوادونو خلک له لا زياتو پرمختيايي لاسته راوړنو څخه په لا مساوي توګه برخمن شي. څلورم، موږ دې د خپلمنځي همکارۍ د پياوړتيا په هڅه کې شو، د نړيوالو ننګونو او خطرونو پر وړاندې د ګډې مقابلې لپاره دې يووالی وساتو.
پنځم، موږ دې د واکمنۍ او خلکو ته د نيکمرغۍ د راوړلو توان پياوړی کړو.
نوموړي خپلو خبرو کې دې ته اشاره وکړه، چې مونږ په بېلا بېلو لارو نيکمرغۍ ته رسيدلی شو او د هر هېواد خلک حق لري، چې د خپل هيواد لپاره نظام انتخاب کړي او ځانګړې پرمختيايي لارې ومومي. ديموکراسي د ګوتو په شمېر هېوادونو امتياز نه دی، بلکې د بېلا بېلو هېوادونو د خلکو قانوني حق دی. د ديموکراسۍ د تر سره کېدو لارې چارې هم مختلفې دي، يو شان نه دي. دا چې کوم هېواد ديموکراتيک دی او يا نه، بهرنيان یې بايد په اړه قضاوت ونه کړي، ځکه دا حق یوازې د همغه هيواد له خلکو سره دی، هغوی بايد پرېکړه او قضاوت وکړي.
د چين کمونېست ګوند د مرکزي کمېسيون عمومي منشي شي جين پينګ د خپلې وينا په ترڅ کې دا هم وويل، چې د چين کمونېست ګوند به پر خپلې لارې ټينګار وکړي، نه يوازې خپل هېواد ته به پرمختګونه ورکړي، بلکې ټولې نړۍ ته به ګټې ورسوي. دغه ګوند به د لوی هېواد د يو لوی ګوند په توګه خپله دنده پر غاړه واخلي او انسانانو ته به نوي خدمتونه وکړي.
په دغې سرمشريزې غونډې کې د جنوبي افريقا، قزاقستان، روسيې، ارجنټاين، ويتنام، کيوبا، فليپين او کمبوډيا دولتي، يا حکومتي مشرانو، چې هم د واکمنو ګوندونو مشران دي، د چين کمونېست ګوند د جوړېدو د ۱۰۰مې کليزې په پار مبارکي وويله او ويناوې يې وکړې.
د ۲۰۲۱م کال د جولای لومړۍ نېټه د چين د کمونېست ګوند د جوړېدو له ۱۰۰مې کليزې سره برابره وه. د چين د کمونېست ګوند او د نړۍ د سياسي ګوندونو انلاين سرمشريزه غونډه، د چين د کمونېست ګوند د جوړېدو د ۱۰۰ مې کليزې د نمانځنې په پار له يو لړ فعاليتونو څخه وه.
