يوه کمېټه پر دې سلا شوې چې د ولسمشرۍ، ولايتي او ولسواليو شوراګانو ټاکنې د راتلونکي کال د چنګاښ ۲۸مې ته وځنډول شي، خو ويل کېږي چې دا هوکړه لا وروستۍ شوې نه ده.
د هغه تازه مهالوېش له مخې چې رسنيو خپور کړی، د ولسمشریزو ټاکنو د نوملیکنې لپاره د روان کال د مرغومي له ۱۱مې د سلواغې تر ۸مې پورې وخت ځانګړی شوی دی.
د دغه مهالوېش له مخې، د ولسمشریزو او نورو ټاکنو د ترسره کولو لپاره د چنګاښ ۲۲مه چې د ۲۰۱۹ ز کال د جولای له ۱۳مې سره برابره ده، په پام کې نیول شوې ده.
په مهالوېش کې د ۱۳۹۸ لمریز کال د زمري ۲۰مه د لومړنيو پایلو د اعلان او د وږي ۲۴مه د ولسمشریزو ټاکنو د وروستیو پایلو د اعلان لپاره په پام کې نیول شوې ده.
یوې کره سرچینې د نوم نه اخیستو په شرط پژواک ته ویلي، د ټاکنیزو کمېسیونونو یو ګډ ټيم چې د دارالانشاء رییسان، د ټاکنیزو کمېسیونونو څلور غړي او د ټاکنو څلور متخصصین پکې شامل دي، د وړمې ورځې په ناسته کې هوکړه کړې چې ټاکنې د سړو او د تګ را تګ لارو د خرابوالي له کبله د حمل له ۳۱مې د چنګاښ تر ۲۲مې پورې وځنډوي.
سرچينې ويلي چې د ولسي جرګې د ټاکنو د رایو ارزولو او بیا شمېرنې، د هوا سړوالي او د ځينو ولایتونو د لارو خرابوالي د ولسمشریزو ټاکنو ځنډ اړين کړی دی.
له دې مخکې داسې گنگوسې وې چې د سولې د خبرو د پیل او په ولسمشریزو ټاکنو کې د طالبانو د ګډون لپاره ښايي ولسمشریزې ټاکنې څو میاشتې وځنډېږي، خو دا موضوع تر اوسه هېڅ رسمي بنسټ نه ده تایید کړې.
د افغانستان د سولې لپاره د امريکا د بهرنيو چارو وزارت استازي زلمي خلیلزاد تېره اونۍ د قطر په پلازمېنه دوحه کې له طالب استازو سره تر دويم ځلي ليدو وروسته په کابل کې يوې خبري ناستې ته وويل، هیله من دی چې افغان دولت او طالبان به په راتلونکو څو میاشتو کې د سولې یوې هوکړې ته ورسېږي، خو د ټاکنو خپلواک کمېسیون رییس عبدالبدیع صیاد بيا يوه خبري کنفرانس ته په خبرو کې پر ټاکلي وخت د ولسمشریزو ټاکنو پر ترسره کېدو ټینګار وکړ او ویې ویل: «سیاسي پرېکړې په موږ پورې تړاو نه لري، په حکومت او طالبانو پورې اړه لري او د ټاکنو پر ترسره کېدو به هېڅ تاثیر ونه لري».
دغه راز صیاد دې ته په اشارې چې تر اوسه د ولسمشریزو ټاکنو د ترسره کېدو د ځنډ په اړه هېڅ تصمیم نه دی نیول شوی وویل، کمېسیون مخکې اعلان کړی چې ولسمشریزې ټاکنې د ۱۳۹۸ لمریز کال د وري په ۳۱مه ترسره کېږي.
خو له دې مخکې هم داسې راپورونه خپاره شوي وو چې د ټاکنو کمېسیون پر ټاکلي وخت د ولسمشریزو ټاکنو د ترسره کېدو توان نه لري او ښايي دا ټاکنې وځنډېږي.
حکومت بيا د ټاکنو د ځنډ خبر رد کړی او ويلي يې دي چې په مخکې اعلان شوې نېټه د ټاکنو ترسره کولو ته بشپړ چمتووالی لري.
