د افغانستان د بیارغونې لپاره د امریکا د ځانګړې پلټنې ادارې یا سیګار ويلي، د ۱۳۹۶ لمریز مالي کال په اوږدو کې لسګونه ميليارده افغانۍ بېلابېلو ادارو لګولې، خو د لګښتونو سندونه یې نه لري.
دې ادارې په خپل تازه راپور کې ويلي، د حزب اسلامي د مشر ګلبدين حکمتیار لګښتونه، د سولې پروګرام، د چارو اداري مامورينو لوړ معاشونه، د ملي امنیت لګښتونه، د افغانستان بانک د قرضونو جبران او د دولتي ادارو اوپراتيفي لګښتونه بې حسابه پاتې دي.
دې ادارې ویلي، د ۱۳۹۶ لمریز کال مالي بودجې يوه برخه د تېرو کلونو په څېر له ټاکلو موخو سره په ټکر کې د حکومتي ادارو له لوري لګول شوې ده.
امنيتي ارګانونه، د ولسمشرۍ ماڼۍ، د چارو اداره، افغانستان بانک او د علماوو شورا هغه بنسټونه دي چې د دې ادارې په وينا د بودجې په مصرفولو کې يې روڼوالی نشته.
د پلټنې ادارې د دغه راپور پر بنسټ، د ملي امنيت ادارې ۲۹۰ ميليونه افغانۍ د ګلبدين حکمتيار د امنيتي تدابيرو، لوجستيک، مېشت ځای او دفتر فعالولو پر چارو لګولې دي.
د دې ادارې مرستيال سيدمهدي حسيني په يوه خبري غونډه کې وويل، دا لګښتونه د ولسمشر په حکم د ماليې وزارت ورکړي او د لګولو هېڅ سند په لاس کې نه شته. دی وايي: « کله چې موږ دا اسناد وليدل، په اسنادو کې د ماليې وزير صېب هم ویلي وو چې د تدارکاتو د قانون له مخې دې دا طی مراحل او ولګول شي او د ولسمشرۍ ماڼۍ حکم هم همداسې و چې په دې برخه کې دې د تدارکاتو قانون مراعت شي، خو موږ چې کله اسناد وغوښتل، په بښنې سره د لګول شويو پیسو په اسنادو کې داسې سند موږ و نه لید چې په هغه کې دې د تدارکاتو قانون مراعت شوی وي».
دې ادارې ویلي، د ملي امنيت ادارې شاوخوا ۳۰۰ ميليونه افغانۍ د سولې او د خلکو د همکارۍ ترلاسه کولو په پروژه کې لګولې چې ملي امنيت د موضوع د محروميت په دلیل د اسنادو له ورکړې ډډه کړې ده.
په دغه راپور کې راغلي، ۶،۷ میليارده افغانۍ د افغانستان بانک شتمنۍ د کمېدو د جبران په موخه منظور شوې چې دغه بانک بيا د ماليې وزارت له لوري په دغه نوم د بودجې له ورکړې منکر دی، خو ويلي یې دي چې ۷،۹ ميليارده افغانۍ یې د کابل له پوروړو ترلاسه کړې دي.
د پلټنې ادارې په وينا، په ۱۳۹۶ لمریز کال کې ارګ، اجراییه ریاست، ملي امنیت رياست او سيمه یيزو ارګانونو ادارې نږدې اته سوه ميليونه افغانۍ تر منظور شويو پیسو ډېرې لګولې دي.
په راپور کې راغلي، تېر کال يو ميليارد افغانۍ ځینو ادارو کارکوونکو ته د فوق العاده (غوره) معاشونو او له کابل ښاروالۍ پوروړو ادارو ته ولسمشرۍ ماڼۍ اجرا کړې چې په اسنادو کې یې څرنګوالی نشته.
د پلټنې ادارې موندنې ښيي چې نږدې دوه ميليونه ډالر د حکومت له بودجې امريکا ته د «افغان ساتنې» په نامه د يوه غيرحکومتي سازمان د غړو پر سفر لګښت شوی او تراوسه یې حساب روښانه شوی نه دی.
له خلکو د مخابراتي ټکسونو راټولول هم هغه څه دي چې پلټنې ادارې يې په روڼوالي شک ښودلی او ويلي يې دي چې سږ کال یې عايد د تېر کال په پرتله کم شوی، په داسې حال کې چې کارکوونکي يې ډېر شوي دي.
