آرین يون: لاریون کوونکو د حکومت وسلې د حکومت پر وړاندې وکارولې

د ولسي جرګې غړي وایي پرونیو لاریون کوونکو هغه وسلې کارولې دي چې حکومت پخپله ورکړې وې. د ولسي جرګې غړې آرین یون د یادې جرګې د نننۍ غونډې په امتیازي ساعت کې د خبرو پر مهال وویل، چې حکومت د عاشورا ورځې د امنیت تر نامه لاندې کابل کې هزاره مېشتو وګړو ته وسلې وېشلې وې. د نوموړې په خبره دغه وسلې بېرته ټولې نه شوې او له همدې وسلو په استفاده، پرونیو لاریون کوونکو په کابل ښار کې ډزې کولې او د کابل ښاریانو ژوند یې تریخ کړی و. نوموړې له حکومت وغوښتل چې د یوه منظم پلان له مخې دې په کابل او شاوخوا سیمو کې له ټولو کسانو وسلې راټولې کړي او هغه کسان دې د قانون منګولو ته وسپاري چې له دې وسلو یې ناسمه استفاده کړې ده. د ولسي جرګې ګڼو نورو غړو هم د پرونیو لاریون کوونکو کړنې وغندلې او هغه یې د حکومت پر وړاندې ښکاره بغاوت وباله. د ولسي جرګې غړو حکومت هم د ورته وضعیت په کنټرول کې ناکام وباله او پر امنیتي ارګانونو یې سختې نیوکې وکړې. دوی پر حکومت غږ وکړ، چې که د غیر مسوولو وسله والو نیول شوی قومندان علي پور مجرم وي نو ژر تر ژره یې دې محاکمه کړي. د غیر مسوولو وسله والو قومندان علي پور چې په جنګي جنایتونو تورن دی پرون د ملي امنیت د ځواکونو له لوري په کابل ښار کې ونیول شو. په کابل کې هزاره مېشتو وګړو ددغه پېښې په غبرګون د لاریون تر نامه لاندې په کابل ښار کې ګډوډي جوړه کړه او خلکو ته یې مالي زیانونه واړول. نن هم د کابل ښار د میرویس میدان او دشت برچي سیمو په شاوخوا کې د ډزو غږونه اورېدل کېږي او هټۍ تړلې دي.