سرچینه: ځانګړو ځواکونو تخار کې د یو بل زورواکي پر کور چاپه وهلې

افغان ځانګړو ځواکونو په تخار کې د پخواني قوماندان جنرال داود د ورور عبدالعلي پر کور عملیات کړي دي. سرچینې وایي چې امنیتي ځواکونو د نوموړي له کوره ۳۰ میله وسله او مهمات تر لاسه کړي، خو هغه خپله په تېښته بریالی شوی دی. د راپورونو له مخې عبدالعلي هم په ځینو مواردو کې په قانون ماتونه تورن دی. په ورته وخت کې ویل کېږي چې امنیتي ځواکونو دوه ورځې وړاندې د سمنګان ولایت د پخواني امنیه قومندان سید اکرم په کور هم عملیات کړي دي، خو هغه هم تښتېدلی دی. راپورونه وایي چې قومندان اکرم بیا د دولت دوه زغروال ټانګونه او دېرش میله وسله له ځان سره وړې ده. د یادونې ده چې افغان حکومت په دې وروستیو کې د هغو کسانو د نیولو لړۍ پیل کړې چې په غیر قانوني کړنو کې لاس لري، چې دې کار یې پراخ غبرګونونه هم راپارولي دي.