په یمن کې د امریکايي بې پیلوټه الوتکې په برید کې د القاعده شبکې شپږ مشکوک غړي وژل شوي دي.
د دغه هېواد امنیتي چارواکو او د سیمې اوسېدونکو ویلي، دا پېښه په البیده ولایت کې شوې ده.
دوی ویلي، په دغه برید کې د القاعده شبکې دوه سیمه ییز مشران او څلور وسله وال وژل شوي دي.
د چارواکو په خبره امریکايي پوځیان په متداومه توګه په ډرون حملو سره په یمن کې د القاعده شبکې وسله وال په نښه کوي.
القاعده شبکې په یمن کې د حوثیانو او حکومت ترمنځ له جګړې نه د ځان په ګټه کار اخیستی او لا یې خپلې لیکې پیاوړې کړې دي.
تر دې وړاندې هم امریکايې بې پیلوټه الوتکو په دغه هېواد کې ورته بریدونه کړي چې ځينې وختونه پکې ملکي وګړو ته هم مرګ ژوبله اوښتې.
