د ټاکنو خپلواک کمېسيون د ولسمشريزو ټاکنو د ځنډولو طرحه له سياسي ګوندونو، څارونکو بنسټونو او مدني ټولنو سره شريکه کړه.
د ټاکنو کمېسيون غړي حفیظ الله هاشمي پرون يوې غونډې ته وويل، د وړاندې شوې طرحې پر بنسټ به د ولايتي شوراګانو، ولسواليو شوراګانو، ولسمشرۍ او د غزني د ولسي جرګې ټاکنې د راتلونکي کال د چنګاښ پر ۲۲مه په يو ځای ترسره شي.
هاشمي وويل، د نوي مهالوېش له مخې به د مرغومي له ۲۱ مې د سلواغې تر ۱۸ مې پورې د رايه ورکوونکو تقويتي نومليکنه کېږي او د کب پر ۱۵ مه به د رايه ورکوونکو نوملړ خپور شي.
دغه راز به د سلواغې له ۱۵ مې بيا د کب تر پنځمې پورې د ټاکنو لپاره د نوماندانو نومليکنه کېږي، د غوايي پر ۱۵مه به يې نوملړ اعلانېږي، د روان کال د مرغومې له ۱۱مې بيا د چنګاښ تر ۱۹مې به ناظرينو ته باورليکونه ورکول کېږي، د غوايي له ۲۲مې بيا د چنګاښ تر ۱۹ مې به د ولسمشريزو ټاکنو کمپاينونه او د غبرګولي له ۳۱مې او د چنګاښ له پنځمې بيا د همدې مياشتې تر ۱۹مې پورې به د ولايتي او ولسواليو شوراګانو ټاکنيز کمپاينونه کېږي.
هاشمي وايي چې د دغه مهالوېش پر بنسټ به د ولسمشريزو ټاکنو پايلې د لړم په ۱۰مه نېټه اعلان شي.
د ټاکنو د خپلواک کمېسيون رييس هم وويل، دوی اړ دي چې د ولسمشريزو ټاکنو لپاره يو داسې مهالوېش اعلان کړي چې ټولو غاړو ته د منلو وړ وي.
د ټاکنو خپلواک کمېسيون تر دې وړاندې د راتلونکي کال د وري ۳۱مه د ولسمشريزو ټاکنو د ورځې په توګه اعلان کړې وه.
