کورنیو چارو وزارت وايي چې په کابل کې ناقانونه لاریون کوونکو پراخ تاوتریخوالی کړی او هغه وسلې یې کارولې چې حکومت د جوماتونو او تکیه خانو د ساتلو لپاره دوی ته ورکړې وې. د کورنیو چارو وزارت ویاند نصرت رحیمي وايي چې لاریون کوونکو په لومړۍ ورځ ۲۶ پولیس ټپیان کړي چې دوه تنه یې پر مرمیو ویشتل شوي. دغه راز په دویمه ورځ یې هم ۲۲ پولیس ټپیان کړي چې دوه تنه یې بیا هم پر مرمیو ویشتلي دي. نوموړی وايي چې دغو ناقانونه لاریون کوونکو د پولیسو اته پوستې او د ملي اردو د جلب او جذب یو مرکز هم سوځولي دي. د ده په وینا د پولیسو ۱۹ موټرو ته یې زیان اړولی او یو یې سوځولی دی. د رحیمي په وینا، لاریون کوونکو د پولیسو پنځه کلاشینکوفونه او دوې توپانچې هم وړې دي. نوموړي دا نه دي ویلي چې دغو کسانو څومره بې ګناه وګړو ته مرګ ژوبله اړولې ده.
په کابل ښار، په ځانګړي ډول د ښار په لوېدیځ کې ورځنی ژوند د دويمې ورځې لپاره هم ګډوډ و. دوکانونه تړلي وو، ښوونځي، پوهنتونونه، روغتونونه او نور مرکزونه له ستونزو سره مخ وو. د خلکو کاروبار خراب و او د وضعيت په دوام سره هره ورځ زرګونو انسانانو ته مالي زیانونه اوړي. دا کار د علي پور په نامه د یوه جنایتکار د خوشي کولو لپاره کېږي، خو چارواکي مني چې دا لاریون کوونکي له بهره هڅول کېږي څو ستونزې جوړې کړي.
حکومت ټینګار کوي چې پر علي پور تورونه دي او که هغه بې ګناه ثابت شو، نو له شرط پرته به خوشی شي. د لاریون کوونکو په نامه کسان بیا وايي چې علي پور باید خوشی شي او هغه عدلي او قضايي ارګانونو ته ځواب ویونکی نه دی. د لاریون والو غوښتنه عدالت نه ده چې ګواکي علي پور دې عادلانه محاکمه شي، بلکې دوی د یوه جنایتکار ملاتړ کوي. دوی غواړي په زور یو جنایتکار چې پرې د خلکو د ځورولو، باج اخیستلو، بندي کولو، وژنو او نورو جرمونو تورونه دي، خوشي کړي. د دوی منطق زور، لوچکي، ناقانونه کړنې، وحشت او جنایت دی. له همدې امله کابل ښار له پرون راهیسې د څو لوچکانو او نا اهله خلکو له خوا له ستونزو سره مخ شوی دی.
دا هم د هېرولو نه ده چې د دوی تر شا سیاسي لاسونه دي. دا سیاسي لاسونه هم په هېواد کې دننه دي او هم له هېواد څخه بهر. هغوی چې د علي پور عادلانه محاکمه غواړي، سم دریځ لري، خو هغوی چې له شرط پرته د علي پور خوشي کول غواړي، د جنایت او ناقانونۍ برخه دي. دغه راز روښانه معلومېږي چې زموږ یو ګاونډی د ځانګړو موخو لپاره غواړي دلته ستونزې جوړې کړي. ایران له امریکا سره د مخامخ زور وهلو توان نه لري، له همدې امله غواړي د خپلو لاسپوڅو پر مټ په کابل کې ستونزې جوړې کړي او له دې لارې پر امریکا د فشار هڅه کوي.
حکومت ته پکار ده چې په لا زیات قاطعیت عمل وکړي. هغوی چې د لاریون په نامه وحشت او جنایت کوي، باید له سخت غبرګون سره مخ شي. امنیتي ځواکونه دې له هغوی سره د باغیانو او مجرمینو په څېر چلند وکړي. که برید کوي، متقابل برید دې پرې وشي او که ورانی کوي، باید ونیول شي او محاکمه شي.
