افغان ولسمشر محمد اشرف غني د جنيوا په کنفرانس کې د ګډون په هدف سویس ته ورسېد.
د ملي يووالي حکومت مشران او مهم چارواکي د جنيوا په کنفرانس کې د ګډون په موخه سويس ته رسېدلي دي.
د جنيوا کنفرانس نن او سبا جوړېږي او ولسمشرۍ ماڼۍ وايي چې افغان لوری به د يوه اړمن هېواد پر ځای د کنفرانس غړو ته د يوه اغېزناک شريک په توګه مهم پيغام وړاندې کړي.
د ولسمشر مرستیال ویاند شاه حسین مرتضوي وايي چې ولسمشر غني پرون له يوه مهم پيغام سره سويس ته رسېدلی دی. هغه زیاتوي: «افغان ولسمشر محمد اشرف غني پرون د یوه لوړپوړي پلاوي په مشرۍ په جنيوا کنفرانس کې د ګډون په هدف سویس ته ورسېد. په پلاوي کې ورسره تر ډېره سکټوري بنسټونه ملتیا کوي. زموږ عمده پیغام دا دی چې افغانستان کولای شي چې له یوه اړمن هېواده پر یوه اغېزناک نړیوال شریک بدل شي او موږ هیله لرو چې مرسته کوونکي هېوادونه به په راتلونکو پنځو کلونو کې د افغانستان د بازار موندنې او پانګې په برخه کې مرستې وکړي.»
د جنيوا په ناسته کې د ولسمشر ترڅنګ اجرایه ريیس عبدالله عبدالله او یوشمېر نور لوړپوړي افغان چارواکي هم برخه اخلي.
مرتضوي وايي، د دې ناستې په څنډه کې به د افغانستان د مسایلو، په ځانګړي ډول د افغان مېرمنو د پیاوړتیا، بشري حقونو، سیمه ییزې پراختیا، خصوصي سکټور، پوهنې او له اداري فساد او مخدره موادو سره د مبارزې په اړه څو نورې بېلابېلې ناستې هم ترسره شي.
ټاکل شوې چې ملګري ملتونه او افغان حکومت به د جنيوا د ګډ کنفرانس کوربانه وي.
د مرتضوي په وینا، په دغه کنفرانس کې د ۶۲ هېوادونو د بهرنیو چارو وزیران او باصلاحیته استازي او د ۳۵ نړیوالو مرسته کوونکو ادارو استازي هم برخه لري.
دوه کاله مخکې د بروکسل په کنفرانس کې د افغان حکومت له خوا د کړو ژمنو څېړنه او د نړیوالې ټولنې له خوا د ژمنو د دوام ټینګار د دې غونډې عمده اهداف بلل شوي دي.
افغان حکومت د بروکسل په غونډه کې ژمنه کړې وه چې په شپږو عمده برخو: ټاکنو، امنیت، مالي او اقتصادي برخو کې به اصلاحات راولي. دغه شان د ښځو د سیاسي پياوړتیا، د ښځو لپاره د مدیریتي زمینې برابرولو او له فساد سره د مبارزې په برخه کې به هم عملي اقدامات کوي.
د ولسمشرۍ ماڼۍ مرستیال ویاند وايي، افغان حکومت په خپلو ژمنو عمل کړی او حاضر دی چې د خپلو لاسته راوړنو په اړه نړیوالې ټولنې ته معلومات ورکړي.
