د چين د دولتي شورا غړی او خارجه وزير وانګ يي به د اګست په ۵مه نېټه د کرونا وبا ضد واکسين د نړيوالې همکارۍ فورم د لومړۍ غونډې مشري وکړي. دغه غونډه به په انلاين ډول تر سره شي او منځپانګه به يې د کرونا وبا ضد واکسين د نړيوالو همکاريو په پياوړتيا او په ټوله نړۍ کې د واکسين پر مساوي او عادلانه ویش ورټوله وي. په دغې ويډيويي غونډې کې به د اړوندو هېوادونو خارجه وزيران يا اړوند چارواکي او د ملګرو ملتونو په شمول د ځينو نړيوالو سازمانونو او تصديو استازي هم ګډون ولري.
د چين د دولت رئيس شي جين پينګ د روان کال په مۍ مياشت کې د نړيوالې روغتيا په سرمشريزه غونډه کې د کرونا وبا ضد د نړيوالې مبارزې د ملاتړ په پار د چين ۵ تدبيرونه اعلان کړل، چې يو پکې د کرونا وبا ضد د واکسين نړيوالې همکارۍ فورم جوړېدل و. د ياد فورم د جوړېدو موخه د رئيس شي جين پينګ د کړې ژمنې پوره کول، د واکسين په اړه د نړيوالې همکارۍ پياوړتيا او په ټوله نړۍ کې د واکسين د عادلانه او مساوي ويش پرمخبيول دي. چين د تر ټولو لوی پرمختيايي هېواد او د نړيوالې ټولنې د يو مسؤل غړي په توګه د انسانانو د روغتيا ګډې ټولنې د جوړولو په مفکورې تر ټولو مخکې واکسين عمومي توليد ګرځولی او پرمختيايي هېوادونو ته يې د کرونا وبا ضد واکسين برابر کړی دی.
مرسته منونکي هېوادونه: چين په ستونزمن وخت کې واکسين برابروي
چين له کمبوډيا سره د کرونا وبا ضد د سينوفارم شرکت جوړ ۱ ميليون دوزه واکسين مرسته وکړه او د روانې مياشتې د لومړۍ نېټې په سهار يې د دغه هيواد پلازمېنې پنوم پنې کې د کمبوډيا اړوندو چارواکو ته وسپارله.
دا ۵م ځل دی، چې چين له کمبوډيا سره د واکسين مرسته وکړه.
د ملګرو ملتونو ماشومانو صندوق د جولای په ۳۱مه نېټه يوګانډا ته د چين مرسته شوی واکسين وليږه. په دغه هيواد کې د م.م د ماشومانو صندوق استازي سفيلدين په خپلو خبرو څرګنده کړه، چې چين د نړۍ تر نورو هيوادونو مخکې په خپل هېواد کې د کرونا وبا خورېدل کنټرول کړي، بيا يې د واکسين د توليد په لومړيو وختونو کې مختلفو هېوادونو سره د واکسين مرستې وکړې، په تېره بيا د يوګانډا په شمول افريقايي هېوادونو ته يې زيات شمېر واکسين برابر کړی دی. دغه هيواد د کرونا وبا ضد نړیوالې مبارزې کې مهم رول لوبوي.
د چين مرسته شوی واکسين په همدې ورځ تانزانيا ته هم ورسېد. دغه راز د چين سره صليب ټولنې پر ځايي وخت د جولای په ۲۹مه نېټه د سوريې پلازمېنې دمشق ته هم واکسين وليږه.
د چين د واکسين صادراتي اندازه د اروپا په پرتله ۱۲۷ سلنه زياتوالی ښيي او د امريکا له ۸۴ چندو سره برابره ده.
بواو اسيايي فورم د جولای په ۲۹مه نېټه په ټوله نړۍ کې د کرونا وبا ضد واکسين د کارولو راپور خپور کړ، چې له مخې يې چين مخ پر ودې هېوادونو ته د واکسين د برابرولو په برخه کې تر ټولو ډېر خدمتونه کړي او د مرسته او صادر شوي واکسين اندازه يې د نورو هېوادونو د واکسين عمومي حجم په پرتله ډېره زياته ده. چين تر اوسه له نورو هېوادونو سره څه باندې ۲۶ ميليونه دوزه واکسين مرسته کړې او څه باندې ۱۰۰ هېوادونو او نړيوالو سازمانونو ته يې د ۵۰۰ ميليونو دوزو په اندازې د واکسين اومه مايع بسپنه کړې، چې دا په ټوله نړۍ کې د کرونا وبا ضد واکسين د کلنۍ توليدي اندازې يو په شپږمه برخه نيسي.
د دې تر څنګ د چين په دننه کې تر ټولو زيات نفوس د کرونا وبا ضد واکسين تزريق کړی او اندازه یې ۱ ميليارډ او ۵۰۰ ميليونو دوزو ته رسيږي. دغه راز په چين کې هره ورځ څه باندې ۲۰ ميليونه دوزه واکسين خلکو ته تزريق کيږي.
د سوداګرۍ نړيوال سازمان عمومي مديرې نګوزي اوکونجو ايويلا وايي، چې نړيوال سفرونه او سوداګري به هله اعاده شي، چې د نړۍ په ګوټ ګوټ کې واکسين په چټکۍ او عادلانه وويشل شي او خلک یې تزریق کړي. واکسين بايد په چټکۍ وویشل شي او د کرونا وبا پر وړاندې نړيواله همکاري بايد د منډې د سیالۍ په څېر وشي.
