ستانکزی: علي پور مجرم دی او خامخا به محاکمه کېږي

د ملي امنیت لوی رییس معصوم ستانکزی وایي، د سیمه ییزو پولیسو قومندان علي پور مجرم دی او د هغه کړي ظلمونه او قانون ماتونې د هیچا له سترګو پټ نه دي. نوموړي وویل چې حتی یوټیوب کې هم له قانون نه د نوموړي د سرغړونې شواهد شته دي. ستانکزي چې نن یې د مشرانو جرګې استجوابیه غونډې ته خبرې کولې سناتورانو ته په خطاب کې وویل، د امنیتي او کشفي ارګانونو له تورونو پرته تاسې خپله کولی شی یوټیوب ته مراجعه وکړی او له قانون نه د نوموړي د سرغړونې شواهد وګوری. هغه وویل علي پور د خلکو یوې غونډې ته په خبرو کې وایي چې دی خپله حکومت دی او له هیچا هم نه وېرېږي. ستانکزي دغه راز وویل، چې علي پور به محاکمه کېږي او د خپلو سرغړونو په اړه به حکومت ته سپیناوی ورکوي. نوموړي له خلکو هم وغوښتل چې د قانون ملاتړ دې وکړي او د هغو کسانو ننګه دې نه کوي چې قانون تر پښو لاندې کوي. د ملي امنیت رییس دغه راز وویل، د ملکي تلفاتو په برخه کې ځان ته برائت نه ورکوي خو په دې برخه کې د دوی هڅې دوام لري، څو د ملکي تلفاتو شمېر صفر ته راټیټ کړي.