د ملي امنيت شورا پخواني سلاکار محمدحنيف اتمر راتلونکو ولسمشريزو ټاکنو ته خپله کانديداتوري اعلان کړه.
اتمر له طلوع نيوز سره په خبرو کې ويلي چې غواړي په راتلونکو ولسمشريزو ټاکنو کې د نوماند په توګه ګډون وکړي.
د اتمر په دفتر کې ځينو سرچينو سپوږمۍ راډيو ته ويلي چې نوموړی له محمديونس قانوني او دغه راز له محمدمحقق سره هم د مرستيالانو په توګه هوکړې ته رسېدلی دی.
که څه هم محمدمحقق او يونس قانوني د افغانستان د لوی ملي ائتلاف غړي دي او دغه ائتلاف لا د راتلونکو ولسمشريزو ټاکنو لپاره خپل دريځ نه دی روښانه کړی، خو داسې ښکاري چې يادو دواړو کسانو له لوی ملي ائتلاف څخه خپله لاره جلا کړې ده.
محمدحنيف اتمر په تېرو ۱۷ کلونو کې د افغان سياست مخکښه څېره پاتې شوې او د کليو د پراختيا، پوهنې، کورنيو چارو د وزير او د ولسمشر غني په حکومت کې يې د ملي امنيت شورا د سلاکار په توګه دنده ترسره کړې ده. هغه راتلونکو ولسمشريزو ټاکنو ته د مخکښو نوماندانو له ډلې يو ګڼل کېږي.
مسير ته رسېدلي معلومات ښيي چې ولسمشر محمد اشرف غني، اجرايه رييس ډاکټر عبدالله عبدالله، د بهرنيو چارو وزير صلاح الدين رباني، د مسعود بنسټ مشر احمدولي مسعود، د کورنيو چارو وزارت پخوانی سياسي مرستيال حکمت خليل کرزی، په هند کې د افغانستان پخوانی سفير شيدا محمد ابدالي، د کورنيو چارو پخوانی وزير محمدعمر داودزی، د نوې ملي جبهې مشر انوارالحق احدي او د بهرنيو چارو پخوانی وزير ډاکټر رنګين دادفر سپنتا ولسمشريزو ټاکنو ته نور احتمالي نوماندان دي.
