د ملي امنیت عمومي رییس معصوم ستانکزی وایي، قومندان علي پور مجرم دی او د هغه کړي ظلمونه او قانون ماتونې د هېچا له سترګو پټ نه دي.
نوموړي وویل چې حتی یوټیوب کې هم له قانونه د نوموړي د سرغړونو شواهد شته. ستانکزي چې پرون یې د مشرانو جرګې استجوابیه غونډې ته خبرې کولې سناتورانو ته په خطاب کې وویل، د امنیتي او کشفي ارګانونو له تورونو پرته تاسې خپله کولی شی یوټیوب ته مراجعه وکړی او له قانون نه د نوموړي د سرغړونو شواهد وګوری.
هغه وویل، علي پور د خلکو یوې غونډې ته په خبرو کې ویلي چې دی خپله حکومت دی او له هېچا هم نه وېرېږي.
ستانکزي دغه راز وویل چې علي پور به محاکمه کېږي او د خپلو سرغړونو په اړه به حکومت ته سپیناوی ورکوي.
نوموړي له خلکو هم وغوښتل چې د قانون ملاتړ وکړي او د هغو کسانو ننګه دې نه کوي چې قانون تر پښو لاندې کوي.
بل پلو د کورنیو چارو وزیر وویل، له دې وروسته هغه لاریونونه او اعتراضونه چې له پولیسو سره له همغږۍ پرته ترسره کېږي، منعه دي او له هغو کسانو سره به قانوني چلند وشي چې دا ډول لاریونونه کوي.
نوموړي د علي پور قضیې ته په اشارې وویل، علي پور تورن دی او پر نوموړي د لګېدلو تورونو له سپیناوي وروسته به یې په اړه پرېکړه وشي. نوموړي زیاته کړه، ملي امنیتي ځواکونه به هېڅکله بې ګناه خلک زندان ته ونه لېږي. برمک چې پرون یې د مشرانو جرګې استجوابیه غونډې ته خبرې کولې وویل، د علي پور د نیول کېدو په غبرګون کې په شویو لاریونونو کې ۴۸ پولیس ټپیان شوي دي. هغه زیاته کړه، هغه کسان چې دا لاریونونه یې په تاوتریخوالي اړولي دي، باید د خپلو ناوړه کړنو ځواب ورکړي. برمک د خپلو خبرو پر دوام وویل، امنیتي ځواکونو تل له خپلو هېوادوالو سره تر حده ډېر نرمښت کړی دی، خو په خبره یې له بده مرغه چې د هغوی له حوصلې ناوړه ګټه اخیستل شوې ده.
برمک دا څرګندونې په داسې حال کې کوي چې د یکشنبې او دوشنبې په ورځو په کابل کې د علي پور د نیول کېدو په غبرګون کې له تاوتریخوالي ډک لاریونونه وشول چې د کورنیو چارو وزارت د معلوماتو له مخې پکې ۴۸ پولیس ټپیان، اته پوستې سوځول شوې او اووه میله وسلې غلا شوې دي.
قومندان علي پور د يکشنبې په ورځ په کابل کې د ملي امنيت ځواکونو له لوري نيول شوی و چې وړمه ورځ د ولسمشر د دويم مرستيال سرور دانش په ضمانت له بنده ازاد شو.
علي پور د هزاره مشرانو په ضمانت حکومت ته ژمنليک ورکړی چې پکې يې د خپلو وسلو د تسليمولو، محکمې ته د حاضرېدلو، په غونډو کې له نه ګډون او دغه راز له کابل ښاره د نه وتلو ژمنې کړې دي.
