ولسمشر غني د دې غونډې په لومړۍ ورځ د خپل حکومت پر تېرو څلور کلنو لاسته راوړنو وغږېد او د راتلونکو پلانونو په اړه یې وضاحتونه وړاندې کړل.
غني د جنیوا غونډې له ګډونوالو وغوښتل چې د افغانستان تولیداتو، په ځانګړې توګه د ښځو لاسي صنایعو ته په خپلو هېوادونو کې بازار پیدا کړي او افغان محصلانو ته په خپلو پوهنتونونو کې د زده کړو زمینه برابره کړي.
د جنیوا غونډه د ملګرو ملتونو په کوربه توب ترسره کېږي چې له افغانستان سره د شپېتو مرستندویه هېوادونو او دېرشو نړیوالو سازمانونو استازو پکې برخه اخیستې ده.
د جنيوا غونډه په دې موخه دايره شوې چې د ملي یووالي حکومت پکې په ۲۰۱۶ ز کال کې د بروکسل کنفرانس پرمهال له نړیوالې ټولنې سره د کړو ژمنو حساب ورکړي.
ولسمشر غني غونډې ته په وينا کې وویل چې حکومت یې د زیربناوو په برخه کې خپلې ژمنې ښې عملي کړې او د یوه منظم پلان له مخې یې د برېښنا شبکه له نیمو ډېرو ولایتونو سره نښلولې او تر راتلونکو دوو کلونو پورې به د ټولو ولایتونو مرکزونه د برېښنا له شبکې سره وصل شي.
هغه دغه راز د هوايي دهلېزونو له لارې د صادراتو د کچې لوړول د خپل حکومت بله ستره لاسته راوړنه وبلله.
غني له نړیوالې ټولنې وغوښتل چې له افغانستان سره د صادراتو د ودې په برخه کې همکاري وکړي او خپل بازارونه د افغان تولیداتو او په ځانګړې توګه د ښځو د لاسي صنایعو پر وړاندې پرانېزي.
هغه وویل چې دا کار به په افغانستان کې د کاروبار له غوړېدو او د هېواد له اقتصادي ودې سره دپام وړ مرسته وکړي.
غني د پانګې د جلب په برخه کې هم د مهمو تګلارو د جوړېدو خبر ورکړ او له مرستندویو هېوادونو یې وغوښتل چې د دغو پالیسیو او پروژو په ارزونه کې ورسره همکاري وکړي.
محمد اشرف غني په خپله وینا کې د افغانستان د طبیعې زېرمو یادونه وکړه چې د ده په وینا استخراج یې باید د افغانستان له ثبات او اقتصادي ودې سره د پام وړ مرسته وکړي.
ولسمشر غني وايي، افغانستان د کار ښه انرژی لري او دغه انرژي به د هېواد په ابادۍ کې ونډه واخلي.
هغه له مرستندویه هېوادونو وغوښتل چې په هره برخه کې د مسلکي ځوانانو د روزل کېدو لپاره اجازه ورکړي چې افغان محصلان په انلاین ډول د دوی پوهنتونونو کې تحصیل وکړي.
ولسمشر غني په داسې حال کې د برېښنا شبکې د پراختیا او هوايي دهلیزونو خبره کوي چې حکومت د هغو کسانو د لېستونو افشا کول ځنډولي چې د برېښنا له اړخه په میلیونونو افغانۍ قرضداران دي او د هوايي دهلېزونو طرحې هم له سبسایډي پرته له ناکامۍ سره مخ دي.
