د جنیوا په کنفرانس کې به نړیوال ظاهراً له افغانستان سره د همکاریو د دوام اعلان وکړي، خو ټاکل شوې چې د ملي یووالي حکومت ته به د مصارفو د کمولو او پر ځان د بسیا کېدو سپارښتنې وکړي.
د سویس پلازمېنه جنیوا کې د افغانستان په تړاو غونډه په داسې وخت کې کېږي چې د ملي یووالي حکومت د نړیوالو مرستو د جلب او جذب په برخه کې له ناکامۍ سره مخ دی.
افغان حکومت وايي، دوی په دغه کنفرانس کې د هغو ژمنو په تړاو نړیوالو ته ځواب ورکوي چې څلور کاله وړاندې یې په بروکسل او وارسا کنفرانسونو کې کړې دي، خو ویل کېږي چې د دغه کنفرانس یو مهم هدف له افغانستان سره د مرستو لپاره د مشخص زماني جدول ټاکل دي.
ټاکل شوې نړیواله ټولنه به ظاهراً له افغانستان سره د همکاریو پر دوام ټینګار وکړي، خو په همدې ترڅ کې به پر افغان حکومت د مرستو کمولو او بندولو یوه مشخصه نېټه اعلان کړي او ترې وبه غواړي چې خپل مصارف راکم او پر ځان بسیا شي.
د شنونکو په باور، ولسمشر غني به هېواد ته تر را ستنېدو وروسته د افغانانو د مالي خودکفایۍ او اقتصادي استقلال په اړه څرګندونې وکړي، خو دا اعلان به یې یوازې تبلیغاتي او کمپایني بڼه لري.
افغان حکومت وايي، له نړیوالو سره یې کړې ژمنې ۵۰ سلنه عملي کړې، خو د افغانستان د رونټیا څار اداره حکومت په کړو ژمنو کې پاتې بولي.
د روڼتیا د څار ادارې مسوولان وایي، ملي یووالي حکومت په تېرو کلونو کې له نړیوالو سره د کړو ژمنو د عملي کېدو پرځای ټول وخت په سیاسي کشمکشونو، قانون جوړونې او پلان جوړونې تېر کړی.
په جنیوا کنفرانس کې د ګډون په هدف ولسمشر غني، د هغه مېرمنې، د کابینې غړو او اجرایه ریيس ډاکټر عبدالله عبدالله په بېلو بېلو الوتکو کې سفر کړی او د نړۍ شاوخوا ۶۲ هېوادونو د بهرنیو چارو وزارتونو معینانو، ځانګړو استازو او د ۳۵ نړیوالو مرسته کوونکو بنسټونو استازو ګډون کړی دی.
د چارو شنونکي د پرمختګ اعلان شوې سلنه ردوي او وایي چې حکومت یوازې ۳۹ سلنه شویو تعهداتو ته عملي بڼه ورکړې ده او نورې ټولې ژمنې یوازې د کاغذ پرمخ پاتې دي.
افغان حکومت هم ویلي چې د جنیوا په کنفرانس کې یې له یوه واضېح لېست سره ګډون کړی، خو دا ځل به له نړیوالو مرستې نه غواړي او په دې کنفرانس کې به د لومړۍ نیمایي لسیزې پرمختګونه او لاس ته راوړنې د نړیوالو له خوا ارزول کېږي او پر ستونزو به خبرې کېږي.
