د پاکستان لومړی وزير عمران خان وايي، په پاکستان کې د تلپاتې سولې لپاره په افغانستان کې سوله ضروري ده او اسلام اباد ته بويه چې د افغان سولې په پروسه کې له نورو هېوادونو سره ګډ رول ولوبوي.
نوموړی دغه راز ويلي، هېواد یې پر خپله خاوره یوه تپل شوې جګړه کړې چې له امله یې پاکستان ستره اقتصادي بیه پرې کړې او ټینګار یې کړی چې په راتلونکي کې به پر خپلې خاورې په دې ډول هېڅ جګړه کې برخه وانه خلي.
عمران خان دا څرګندونې د دوشنبې په ورځ شمالي وزیرستان ته د خپل پټ سفر پر مهال د شمالي او جنوبي وزیرستان د قومي مشرانو یوې غونډې ته د وینا پر مهال کړې دي.
د پاکستاني پوځ مطبوعاتي څانګې «ISPR» وزيرستان ته د عمران خان تر پټ سفر وروسته په يوه خپره کړې خبرپاڼه کې ويلي چې له عمران خان سره په دغه سفر کې د پوځ مشر او یو شمېر حکومتي وزیران هم شامل وو.
عمران خان د وزيرستان د مشرانو غونډې ته ويلي چې پاکستان پر خپله خاوره تپل شوې جګړه کړې او ټینګار یې کړی چې هېواد به یې په راتلونکي کې پر خپله خاوره دا ډول جګړه ونه کړي.
عمران خان همدا شان غونډې ته د وینا پر مهال د افغانستان یادونه هم کړې او د پاکستان د تلپاتې سولې لپاره یې په افغانستان کې سوله مهمه بللې او زیاته کړې یې ده: «موږ له پولو وراخوا سوله غواړو. موږ باید د سولې په پروسه کې له نورو شریکوالو سره یوځای رول ولوبوو، ځکه چې د پاکستان د تلپاتې سولې لپاره په افغانستان کې سوله ضروري ده».
د عمران دا څرګندونې په داسې حال کې دي چې پر پاکستان د ترهګرو د ملاتړ له کبله نړيوال فشارونو تر ټولو لوړې کچې ته رسېدلي دي.
د امريکا متحدو ايالتونو پر دغه هېواد خپلې ټولې مرستې له دې کبله ځنډولې دي چې ګنې اسلام اباد له ترهګرو ملاتړ کوي. پاکستان د دغو فشارونو په پايله کې له سختو اقتصادي ستونزو سره لاس او ګرېوان شوی او عمران خان د پورونو په اخيستلو پسې لالهاند دی.
