نن به نړیواله ټولنه؛ له افغانستان سره د میلیاردونو ډالرو مرستې ژمنې تازه کړي

د جینوا اصلي غونډه نن پیلېږي او ولسمشر غني به دغه غونډې ته وینا کوي. غونډه د جینوا په وخت په نهو بجو پیل کېږي او ولسمشر غني به په لومړي سر کې د خپل حکومت د لاس ته راوړنو او وروسته د اصلاحاتو او ښې حکومتولۍ په برخه کې خپلې نوې ژمنې وکړي. تر هغه وروسته به نړیواله ټولنه له افغانستان سره د مرستو ژمنې کوي او غونډه به د ډاکټر عبدالله عبدالله، همایون قیومي او د افغانستان لپاره د ملګرو ملتونو د ځانګړي استازي یاممتو تادامیچي په وینا پای ته رسېږي. جینوا د افغانستان لپاره مهم کنفرانس بلل کېږي او نړیواله ټولنه به دا ارزوي چې افغان حکومت له دغه ټولنې سره پر خپلو کړو ژمنو څومره وفا کړې ده. همدې ارزونې ته په پام به دوی له افغانستان سره نورې مرستې کوي.