په دې وروستیو کې د امربالمعروف وزارت له خوا ځینې توصیې او غوښتنې لانجمنې شوې دي. که څه هم د وزارت چارواکي وايي چې دا حکمونه نه دي، بلکې توصیې دي او که یې څوک مراعات نه کړي، جزا به نه ویني، خو ځیني کسان وېره لري چې ښايي امارت په دې چاره کې جدیت وکړي. د امربالمعروف او نهی عن المنکر وزارت څه کوي او ایا د پخواني امارت تجربې بیا تکرارېږي؟
له ۲۰۰۱ کال وړاندې د اسلامي امارت واکمني ډېره تونده او جدي وه، خو تر ټولو توند، جدي او حتی افراطي چلند د امربالمعروف له خوا کېده. امربالمعروف هغه وخت ډېر زیات خلک وهلي او بندي کړي دي. دوی به په وړو خبرو خلک وهل، رټل او بندي کول. د ږیرې د پوره خریلو خبره خو بیخي جدي وه، خو که به چا د ږیرې د وېښتانو سرونه هم پرې کړې وو، امربالمعروف به ورته غبرګون ښود او خلک به یې وهل. له چادري پرته د ښځو وهل او نور ډېر واړه مسایل یې جدي ګڼلي وو. له ۲۰۰۱ کال وړاندې ولس تر بل هر چا ډېر له دې ادارې په تکلیف و او له همدې امله یې له امارت سره فاصله ونیوله. له ۲۰۰۱ کال وروسته د اسلامي امارت چارواکو منله چې امربالمعروف اداره یې سمه نه وه، خلک یې په ناحقه وهل او بندي کول او دې ادارې د اسلامي امارت په بدنامۍ او له امارت د خلکو په لرې کولو کې اساسي رول لوباوه. آن وروسته د امارت چارواکو دا هم منله چې دې ادارې چې څه کول، اسلام هم د داسې کار اجازه نه وه ورکړې او دا داسې کار و چې نه یې په اسلامي تاریخ کې بېلګه وه او نه هم رښتینو دیني عالمانو تاییداوه.
اوس چې کله بیا د امربالمعروف ادارې نوم اخیستل کېږي، نو د خلکو ذهنونو ته همغه پخوانۍ کیسې ورځي، خو دا ځل امربالمعروف تر هغه متفاوت ښکاري. تر اوسه ددغه وزارت له کړنو ښکاري چې دوی نه غواړي پخوانۍ تجربې تکرار کړي او دا ښه ګام دی. ددې مانا دا نه ده چې امربالمعروف او نهی عن المنکر باید ونه شي، دا باید وشي، خو نه یوازې معروف او منکر باید واضح وي، بلکې د کار طریقه هم باید له اسلامي اصولو سره سمه وي او له حکمته پکې کار واخیستل شي. هغه مسایل باید جدي ونیول شي چې اسلام جدي ګڼلي دي او هغه مسایل باید جدي ونه ګڼل شي چې اسلام جدي نه دي ګڼلي. تر اوسه چې د امربالمعروف او نهی عن المنکر وزارت څه کوي تر ډېره سم دي، خو په ځینو مسایلو کې ښکاري چې د تجربې نه لرلو له امله کله داسې ګامونه پورته کړي چې بېرته خپله وزارت ته سرخوږی جوړ کړي او یا یې هم مخالفین د وزارت پر ضد د تبلیغ لپاره کاروي. له همدې امله په هر ګام کې باید پوره احتیاط وشي او په پوره حکمت سره مخ ته ولاړ شي. تر دې مهمه دا ده چې امربالمعروف او نهی عن المنکر تر ډېره له چارواکو سره وشي، ځکه خلک چارواکو ته ګوري او همغسې ځان برابروي.
په ټوله کې د امربالمعروف او نهی عن المنکر وزارت تر اوسه پورې پخوانۍ ترخې تجربې نه دي تکرار کړي او تمه ده چې تکرار یې نه کړي. ددغه وزارت کارونه که له یوه اړخه مهم دي او باید ښه مخ ته ولاړ شي، له بله اړخه تل باید پکې حکمت له پامه ونه غورځول شي.
